Afət Ziyadqızı
Baltik dənizi üzərində NATO və Rusiya təyyarələri arasında gərginlik yaşanıb
“Operativ Məlumat Mərkəzi-OMM” xəbər verir ki, bu barədə “Deutsche Welle” məlumat yayıb.
Bildirilib ki, aprelin 20-də Fransanın “Rafale” qırıcıları İsveç, Finlandiya, Polşa, Danimarka və Rumıniya təyyarələri ilə birlikdə Baltik dənizi üzərində Rusiyanın strateji bombardmançılarını müşayiət edib.
Məlumata görə, Rusiya tərəfi uçuş zamanı iki ədəd Tu-22M3 bombardmançı təyyarəsi, eləcə də Su-30 və Su-35 qırıcılarından istifadə edib. "Associated Press"in jurnalisti Litvanın Şyaulyay şəhərində yerləşən aviabazadan Fransaya məxsus təyyarələrin havaya qalxmasını müşahidə edib.
Qeyd olunub ki, Rusiya Müdafiə Nazirliyi həmin gün Baltik dənizinin neytral suları üzərində planlaşdırılmış uçuş həyata keçirildiyini açıqlayıb və uçuşların beynəlxalq qaydalara uyğun olduğunu bildirib.
Nəşrin məlumatına görə, marşrutun bəzi hissələrində Rusiya bombardmançıları xarici qırıcı təyyarələrin müşayiəti ilə uçuş edib.
Litva Müdafiə Nazirliyi isə bildirib ki, 13–19 aprel tarixlərində NATO pilotları Rusiya təyyarələrinin qaydaları pozması səbəbilə dörd dəfə havaya qalxıblar. Bu pozuntular arasında transponderlərin söndürülməsi, uçuş planı olmadan hərəkət və dispetçerlərlə əlaqənin olmaması göstərilir.
