Afət Ziyadqızı
NASA-nın “Curiosity” roveri Marsın Mount Sharp dağında, sulfatlarla zəngin təbəqələrin yerləşdiyi Valle Grande bölgəsində səthdə kiçik və dayaz dəliklər aşkarlayıb.
“Operativ Məlumat Mərkəzi-OMM” xəbər verir ki, təxminən 1 santimetr genişliyində olan bu strukturlar daha əvvəl müşahidə edilən çökəkliklərdən fərqlənir. Belə ki, dəliklərin ətrafında eroziya nəticəsində ayrılmış çınqıl və ya mineral qalıqları qeydə alınmayıb.
Dəliklərin çox dayaz və geniş olması Marsda məlum olan aşınma proseslərindən fərqli mexanizmin mövcudluğuna işarə edə bilər. Bununla belə, alimlər hələlik strukturların yaranma səbəbi barədə yekun nəticəyə gəlməyiblər.
“Curiosity” komandasının məlumatına görə, araşdırma üçün roverin gövdəsində yerləşən MAHLI və Mastcam kameralarından istifadə olunur. Ərazidən çəkilən yaxın planlı görüntülər və səthin üçölçülü modelləri təhlil edilir.
Rover son günlər Mount Sharp dağına qalxışı zamanı 1000 metr yüksəklik qazanması həddini keçib. Aparat bölgədəki müxtəlif qaya təbəqələrinin kimyəvi tərkibini və aşınma xüsusiyyətlərini öyrənməyə davam edir.
Elm adamları yeni strukturların indiyədək məlum olmayan eroziya prosesindən, yoxsa süxurların fərqli fiziki xüsusiyyətlərindən qaynaqlandığını müəyyənləşdirmək üçün əldə olunan məlumatları analiz edəcəklər.
