OMM Redaksiyası
Mədəniyyət Nazirliyinin tabeliyində fəaliyyət göstərən uşaq musiqi, incəsənət və rəssamlıq məktəblərində çalışan müəllimlər üçün qiymətləndirmə sistemi tamamilə dəyişir. Təhsilverənlərin bilik və bacarıqları artıq ənənəvi attestasiya yolu ilə deyil, xüsusi qaydalar əsasında keçirilən sertifikasiya vasitəsilə yoxlanılacaq.
"Operativ Məlumat Mərkəzi-OMM" xəbər verir ki, bu islahatla bağlı Əmək Məcəlləsinə və "Təhsil haqqında" qanuna dəyişikliklər təklif edilib. Sözügedən layihə Milli Məclisin Elm və təhsil komitəsinin bugünkü iclasında müzakirəyə çıxarılıb.
Attestasiya niyə ləğv edilir? Mövcud problemlər
Müzakirələr zamanı qeyd olunub ki, hazırkı qanunvericiliyə əsasən attestasiya nəticələri yalnız sənədləşdirilmiş protokollarla məhdudlaşır. Bu sənədlərdə peşə uyğunluğu və bacarıqlar üzrə obyektiv testlər əksini tapmır.
Bundan əlavə, rəqəmsal qiymətləndirmə alətləri və performans dəyərləndirmə sistemlərinin tətbiq edilməməsi prosesin obyektivliyini azaldır və müasir tələblərlə uzlaşmır.
Həmçinin, attestasiya nəticələrinin hüquqi əsaslandırılması aydın tənzimlənmədiyindən, əmək mübahisələri riski artır. Şifahi formada keçirilən attestasiyada meyarların ölçüləbilən olmaması subyektiv yanaşmalara yol açır. Bu proses həm də əlavə maliyyə yükü yaradır və dövlət vəsaitlərinin səmərəsiz istifadəsinə səbəb olur.
Sertifikasiya təhsil sisteminə nə qazandıracaq?
Yeni layihənin qəbulu ilə təhsilverənlər nəzəri bilik və təcrübələrini sertifikasiya imtahanı vasitəsilə təsdiqləyəcəklər. Bu dəyişiklik prosesin şəffaflığını, nəticələrin etibarlılığını və müqayisə edilə bilməsini təmin edəcək.
Yekun hədəf təhsil müəssisələri şəbəkəsinin inkişafı və təhsilin keyfiyyət səviyyəsinin yüksəldilməsidir.
Eyni zamanda, sertifikatlaşdırma prosesi ixtisas üzrə biliklərin mütəmadi yenilənməsini tələb edir. Bu yanaşma təhsilverənlərin davamlı peşəkar inkişafını və bilik-bacarıqlarının daim artırılmasını təşviq edəcək.
