OMM Redaksiyası
Azərbaycan şahmatçısı Şəhriyar Məmmədyarov Budapeştdə keçirilən “Total Chess World Championship Tour Pilot 2026” turnirinin C qrupunun dördüncü turunda Maqnus Karlsenlə hər iki partiyanı heç-heçə başa vurub.
İlk partiyada Məmmədyarov qara, ikinci görüşdə isə ağ fiqurlarla oynayıb. Turnirin qaydalarına əsasən, qələbəyə üç, heç-heçəyə bir xal verildiyindən şahmatçıların hər biri gün ərzində iki xal qazanıb.
C qrupunda vəziyyət
Məmmədyarov doqquz xalla dördüncü pillədə qərarlaşıb. Yeddi xalı olan Karlsen beşincidir. Qrupa 13 xalla niderlandlı Aniş Giri başçılıq edir, Yan Nepomnyaşi və Hayk Martirosyan isə 11 xalla ikinci və üçüncü yerləri tuturlar. Abhimanyu Mişranın hesabında altı xal var.
Qrup mərhələsinin sonuncu, beşinci turunda Məmmədyarov məhz Giri ilə qarşılaşacaq. Noyabrın 15-də Bakı vaxtı ilə saat 18:00-da başlayacaq ilk partiyada azərbaycanlı şahmatçı ağ fiqurlarla oynayacaq. Saat 21:30-da start götürəcək ikinci partiyada fiqurların rəngləri dəyişəcək.
Məmmədyarov dörd turda bir qələbə qazanıb, altı dəfə heç-heçə edib və bir görüşdə məğlub olub. Qrup mərhələsində yekun mövqeyi son turun nəticələrindən sonra bəlli olacaq.
Pley-off mərhələsi
Dörd qrupun qalibləri əsas çempionluq uğrunda pley-offa yüksələcəklər. Digər şahmatçılar qrupdakı yerlərinə uyğun təsnifat mərhələlərində yarışacaqlar. Pley-off qarşılaşmaları noyabrın 17-20-də keçiriləcək.
Kontekst
Noyabrın 14-də Məmmədyarov C qrupunun üçüncü turunda Abhimanyu Mişra ilə hər iki partiyanı heç-heçə başa vurmuşdu.
