OMM Redaksiyası
“Sabah”ın prezidenti Maqsud Adıgözəlov Polşa mediasına müsahibəsində komandanın müdafiəçisi Timoteuş Puxaç barədə danışıb. Klub rəhbəri 27 yaşlı futbolçunun peşəkarlığını və davranışını yüksək qiymətləndirib.
Adıgözəlov bildirib ki, oyunçuları yalnız matçlarda deyil, məşqlərdə, idman zalında və asudə vaxtlarında da müşahidə edir. Onun sözlərinə görə, futbolçuların komanda yoldaşları ilə ünsiyyəti və işlərinə münasibəti də önəmlidir.
“Timoteuş fantastik futbolçu və çox xoş xasiyyətli gəncdir. Amma hər şeydən əvvəl onu əsl peşəkar adlandırardım. Bu baxımdan Timoteuş məndə çox böyük təəssürat yaradıb. Əminliklə deyə bilərəm ki, o, sözün əsl mənasında peşəkardır”, – Adıgözəlov deyib.
Puxaçın transferindəki maraqlı məqam
Klub prezidenti Puxaçın “Sabah”a keçməzdən əvvəl Polşanın “QKS Katovitse” klubu ilə müqavilə imzalamağa çox yaxın olduğunu bildirib. Adıgözəlov bəzi futbol hadisələrini yalnız məntiqlə izah etməyin çətin olduğunu deyib.
“Bildiyimə görə, polyak dilində “Puxaç” bayquş növlərindən birinin adıdır. Bayquş isə “Sabah”ın simvoludur. Deməli, bu transferdə bir qədər mistik məqam da var. Bəlkə də Timoteuşun bizim komandaya qoşulması onun taleyində var idi”, – klub prezidenti vurğulayıb.
Puxaç 2025-ci ildə “Sabah”a qoşulub. O, Bakı klubu ilə Azərbaycan çempionu və ölkə kubokunun qalibi olub, həmçinin UEFA Çempionlar Liqasının əsas mərhələsinə yüksəlib.
