OMM Redaksiyası
İngiltərənin "Mançester Yunayted" klubu heyətini gücləndirmək istiqamətində addımlar atır.
"Operativ Məlumat Mərkəzi-OMM" xəbər verir ki, "Qırmızı şeytanlar" növbəti mövsüm üçün heyətinə yeni qapıçı cəlb etməyi planlaşdırır.
Bu dəfə klubun diqqət mərkəzində "Lids"in təcrübəli qolkiperi Karl Darlov yer alıb.
35 yaşlı uelsli qapıçının "Lids" ilə olan müqaviləsi cari ilin iyun ayının sonunda başa çatır. Bu o deməkdir ki, futbolçu azad agent statusu ilə istənilən kluba keçə bilər.
"Mançester Yunayted" rəhbərliyi onu komandada ikinci qapıçı qismində görmək istəyir. Hazırda mankunianların əsas qapıçısı qismində Senne Lammens çıxış edir.
Ötən mövsüm İngiltərə Premyer Liqasında "Lids"in heyətində 22 matça çıxan Karl Darlov ümumilikdə 27 qol buraxıb. Bununla yanaşı, o, 5 qarşılaşmada qapısını toxunulmaz saxlamağı bacarıb. Təcrübəli qolkiperin bu göstəriciləri "Mançester Yunayted"in məşqçilər heyətinin diqqətini çəkib.
