İngiltərənin "Mançester Yunayted" klubu qapıçı mövqeyini gücləndirmək üçün yeni namizəd müəyyənləşdirib.
"Operativ Məlumat Mərkəzi-OMM" xəbər verir ki, "qırmızı şeytanlar" Şotlandiya yığmasının və "Nottingem Forest" klubunun qapıçısı Anqus Qannı transfer etməkdə maraqlıdır.
Məlumata görə, 30 yaşlı qolkiperin "Nottingem Forest" ilə müqaviləsinin müddəti cari ayın sonunda başa çatır. Bu səbəbdən o, azad agent statusu ilə istənilən kluba keçmək hüququ qazanacaq.
Bildirilib ki, "The Sun" nəşrinin yaydığı məlumata əsasən, "Mançester Yunayted" rəhbərliyi şotlandiyalı qapıçını ehtiyat variant kimi heyətə cəlb etməyi planlaşdırır.
Qeyd olunub ki, Anqus Qann karyerası ərzində "Mançester Siti", "Norviç", "Sauthempton" və "Stok Siti" klublarının formasını geyinib.
Məlumata əsasən, qolkiper ötən mövsüm "Nottingem Forest"in heyətində İngiltərə Premyer Liqasında cəmi bir oyunda meydana çıxıb. Buna baxmayaraq, o, 2026-cı il Dünya Çempionatında Şotlandiya yığmasının əsas heyət üzvlərindən biri olub.
Bildirilib ki, Anqus Qann mundialın qrup mərhələsində keçirilən bütün qarşılaşmalarda iştirak edib və həmin oyunlarda qapısında ümumilikdə 4 qol görüb.
