Kuba rəsmiləri ABŞ-nin ölkənin mədənçıxarma, xarici ticarət və metallurgiya sektorlarına tətbiq etdiyi yeni sanksiyalara sərt reaksiya verib.
“Operativ Məlumat Mərkəzi – OMM” xəbər verir ki, Kübanın xarici işlər naziri Bruno Rodriges “X” sosial şəbəkəsindəki hesabında ABŞ dövlət katibi Marko Rubionu Kuba əhalisinin təməl xidmətlərə çıxışını qəsdən məhdudlaşdırmaqda günahlandırıb.
Nazirin sözlərinə görə, tətbiq olunan məhdudiyyətlər xüsusilə kiçik və orta sahibkarlıq subyektlərinin fəaliyyətinə ciddi zərbə vurur. Sanksiyalar nəticəsində ərzaq, dərman və tibbi avadanlıq daşıyan konteynerlərin çatdırılmasında ciddi çətinliklər yarandığı bildirilir.
Rodriges ABŞ-nin bu siyasətini Kubaya qarşı “uğursuz bir obsesiya” adlandıraraq Vaşinqtonu sərt şəkildə tənqid edib.
Qara siyahıya salınan qurumlar və şəxslər
ABŞ-nin təzyiq siyasəti çərçivəsində həyata keçirdiyi son tədbirlər zamanı bir sıra dövlət qurumları və rəsmilər sanksiya siyahısına daxil edilib.
Məlumata görə, siyahıya İnşaat Nazirliyi də daxil olmaqla 9 dövlət qurumu, mədənçıxarma, xarici ticarət və metallurgiya sektorları ilə əlaqəli şəxslər, həmçinin “Kuba Xalqlarla Dostluq İnstitutu”nun (ICAP) üç yüksək vəzifəli rəsmisi əlavə olunub.
Sanksiya tətbiq olunan şəxslər arasında ICAP-ın sədri Fernando Qonzales Lyort, birinci müavini Noemi Rabaza Fernandes və Şimali Amerika üzrə direktoru Leyma Martines Freyra da var.
Qeyd edək ki, Fernando Qonzales Lyort daha əvvəl “Yaban Arısı Ağı” (Red Avispa) adlı kəşfiyyat qrupunun üzvü kimi ABŞ-də məhkum edilib və sonradan Kubaya qaytarılıb.
