Afət Ziyadqızı
Kubanın xarici işlər naziri Bruno Rodriges Parrilla ABŞ dövlət katibi Marko Rubionun Kubanı ABŞ-nin milli təhlükəsizliyi üçün təhdid hesab etməsi ilə bağlı fikirlərini təkzib edib. Nazir özünün “X” sosial şəbəkə hesabında bu açıqlamaları “yalan” adlandırıb.
Rodriges qeyd edib ki, ABŞ rəsmisi dezinformasiya yaymaqla iki ölkə vətəndaşları arasında gərginliyi artırır və hərbi təcavüz üçün zəmin hazırlayır. Nazirin sözlərinə görə, Kuba heç vaxt ABŞ üçün təhlükə yaratmayıb, ölkədəki iqtisadi çətinliklərin əsas səbəbi isə Vaşinqtonun tətbiq etdiyi sərt sanksiyalardır.
Nazir ABŞ-ni aşağıdakı məqamlarda ittiham edib:
- Kuba xalqına qarşı uzun illərdir davam edən sistemli təzyiq və blokadanın gücləndirilməsi.
- Öz ərazisində Kubaya qarşı terror aktları törədənlərə sığınacaq verilməsi və bu fəaliyyətlərə göz yumulması.
- Birtərəfli məcburi tədbirlərin ölkənin iqtisadi inkişafına, o cümlədən özəl sektora vurduğu ciddi zərbə.
Xatırladaq ki, Marko Rubio daha əvvəl Kubanı milli təhlükəsizlik üçün təhdid adlandırmış və rəsmi Havana ilə diplomatik razılaşma perspektivlərinin aşağı olduğunu bildirmişdi. Eyni zamanda, ABŞ prezidenti Donald Trampın Kubaya qarşı hərbi müdaxilə ehtimalını dilə gətirməsi və tətbiq olunan neft embarqosu ölkədəki enerji böhranını, eləcə də elektrik kəsintilərini daha da dərinləşdirib.
