Rusiya hakimiyyəti NATO-nun Rusiyanı Avroatlantik təhlükəsizlik üçün "uzunmüddətli təhdid" kimi tanımasına sərt reaksiya verib.
"Operativ Məlumat Mərkəzi-OMM" xəbər verir ki, Kremlin sözçüsü Dmitri Peskov "RIA Novosti"yə açıqlamasında bu qərarı alyansın aqressiv addımı kimi qiymətləndirib.
Məlumata görə, Peskov hər hansı bir tərəfin rəsmi şəkildə rəqib elan edilməsinin özlüyündə qarşıdurmanı artıran addım olduğunu bildirib.
Bildirilib ki, Kremlin nümayəndəsinin sözlərinə görə, bu cür yanaşma Rusiyanı daxili siyasətini, iqtisadiyyatını və texnoloji imkanlarını gücləndirməyə, eləcə də milli maraqlarını daha qətiyyətlə qorumağa sövq edir.
Peskov həmçinin NATO-nun tarixən SSRİ-yə, daha sonra isə Rusiyaya qarşı yönəlmiş hərbi-siyasi struktur olduğunu iddia edib və alyansın hazırkı siyasətini həmin xəttin davamı kimi qiymətləndirib.
Qeyd edək ki, NATO liderləri sammitin yekun bəyannaməsində Rusiyanı Avroatlantik təhlükəsizlik üçün əsas təhdid kimi göstəriblər. Rusiya Prezidenti Vladimir Putin isə bu ittihamları dəfələrlə rədd edərək, Qərb ölkələrinin Moskva tərəfindən gələn təhlükə iddiasından öz hərbi hazırlıqlarını əsaslandırmaq üçün istifadə etdiyini bildirib.
