Rusiya Ukraynanın ölkənin ticarət və iqtisadi infrastrukturuna endirdiyi zərbələrə sərt cavab verəcəyini açıqlayıb.
“Operativ Məlumat Mərkəzi – OMM” xəbər verir ki, bunu Kremlin sözçüsü Dmitri Peskov “Bloomberg” agentliyinə açıqlamasında bildirib.
Peskovun sözlərinə görə, Kiyevin Rusiya iqtisadiyyatına zərər vurmağa yönəlmiş addımları Moskvanın cavab reaksiyasına səbəb olur.
“Ukrayna bizim iqtisadi və ticarət infrastrukturumuza zərbə endirməyə çalışır, bununla da bizdən cavab reaksiyası doğurur və bu, sərt bir reaksiya olacaq”, - deyə Peskov bildirib.
Kreml nümayəndəsi vurğulayıb ki, Ukraynanın bu istiqamətdəki hücumları Rusiyanın mövqeyini dəyişməyəcək.
Peskov daha əvvəl mülki və infrastruktur obyektlərinə zərbələrin döyüş zonasındakı vəziyyəti dəyişmək və Rusiya qoşunlarının irəliləməsinin qarşısını almaq gücündə olmadığını bildirib.
Rusiya Prezidenti Vladimir Putin də Kiyevin bu hücumlarla Rusiya ordusunun əməliyyatlarını dayandırmağa çalışdığını deyib.
Putin Rusiyanın qarşıya qoyduğu məqsədlərə çatmaqda qərarlı olduğunu vurğulayıb və Ukrayna ərazisindəki hədəflərə qarşı daha güclü cavab zərbələrinin endiriləcəyi barədə xəbərdarlıq edib.
