Afət Ziyadqızı
Rusiya Prezidenti Vladimir Putinin iyulun 27-də beynəlxalq telefon danışığı aparacağı açıqlanıb.
“Operativ Məlumat Mərkəzi-OMM” xəbər verir ki, bu barədə Kremlin mətbuat katibi Dmitri Peskov məlumat verib.
Bildirilib ki, Peskov jurnalistlərə açıqlamasında danışığın günün ikinci yarısında baş tutacağını qeyd edib. Kremlin sözçüsü əlavə məlumatların daha sonra təqdim olunacağını bildirib.
Qeyd olunub ki, Vladimir Putin daha əvvəl Rusiyanın beynəlxalq arenadakı mövqeyi ilə bağlı açıqlamalar verib. O, Rusiya Hərbi Dəniz Qüvvələrinin beynəlxalq təlimlərdə iştirakının ölkəni müdafiə və təhlükəsizlik sahəsində təcrid etmək cəhdlərinin uğursuz olduğunu göstərdiyini bildirib.
Rusiya lideri vurğulayıb ki, Moskva ilə dost münasibətlər saxlayan və ölkənin təhlükəsizlik maraqlarını, eləcə də çoxqütblü dünya qurmaq istiqamətindəki mövqeyini anlayan çoxsaylı dövlətlər mövcuddur.
Xatırladaq ki, iyulun 4-də Vladimir Putin və ABŞ Prezidenti Donald Tramp arasında telefon danışığı baş tutmuşdu. Təxminən 1 saat 25 dəqiqə davam edən görüşü Kremlin xarici siyasət üzrə köməkçisi Yuri Uşakov "işgüzar və olduqca konstruktiv" kimi qiymətləndirmişdi.
