Baş prokuror yanında Korrupsiyaya qarşı Mübarizə Baş İdarəsində ötən il daxil olan müraciətlər və digər məlumatlar əsasında geniş araşdırmalar aparılıb.
"Operativ Məlumat Mərkəzi-OMM"-in məlumatına görə, bu barədə qurumda 2025-ci ilin yekunlarına həsr olunmuş əməliyyat müşavirəsində açıqlama verilib.
Bildirilib ki, il ərzində Baş İdarə tərəfindən 315 müraciət və digər məlumat cinayət xarakterli material kimi araşdırılıb. Aparılan yoxlamalar nəticəsində 267 material üzrə Cinayət Məcəlləsinin müxtəlif maddələri ilə cinayət işləri başlanıb.
Eyni zamanda, 48 material üzrə cinayət işinin başlanması rədd edilib. Həmin materiallardan 14-ü üzrə vurulmuş maddi ziyanın ödənilməsi də nəzərə alınıb, bununla yanaşı, digər prokuror təsir tədbirləri tətbiq olunub.
Müşavirədə qeyd edilib ki, əməliyyat qurumlarının fəaliyyəti nəticəsində ümumilikdə 114 cinayət işi başlanıb. Keçirilmiş əməliyyat-axtarış tədbirləri zamanı korrupsiya cinayətləri törətməkdə şübhəli bilinən 18 nəfər cinayət başında yaxalanıb.
Qurum tərəfindən korrupsiyaya qarşı mübarizə istiqamətində tədbirlərin bundan sonra da ardıcıl şəkildə davam etdiriləcəyi vurğulanıb.
