Kolumbiyanın işğal altındakı Suriya ərazisi olan Qolan təpələri üzərində İsrailin suverenliyini tanıması ərəb ölkələri və beynəlxalq təşkilatlar tərəfindən kəskin etirazla qarşılanıb.
“Operativ Məlumat Mərkəzi – OMM” xəbər verir ki, Səudiyyə Ərəbistanı, Küveyt, İordaniya və Livanın xarici işlər nazirlikləri, eləcə də Ərəb Dövlətləri Liqası və Körfəz Əməkdaşlıq Şurası (KƏŞ) Kolumbiyanın qərarını beynəlxalq hüquqa zidd hesab edərək rədd ediblər.
Səudiyyə Ərəbistanı Xarici İşlər Nazirliyinin bəyanatında bildirilib ki, Kolumbiyanın qərarı beynəlxalq hüququn fundamental prinsiplərinə, o cümlədən BMT Təhlükəsizlik Şurasının 1981-ci ildə qəbul etdiyi 497 saylı qətnaməyə ziddir.
Küveyt və İordaniya da Qolan təpələrinin Suriyanın ayrılmaz hissəsi olduğunu və ərazinin işğalının legitimləşdirilə bilməyəcəyini vurğulayıblar.
Livan rəsmiləri isə Suriyanın ərazi bütövlüyünə və suverenliyinə hörmət edilməsinin vacibliyini qeyd ediblər.
Ərəb Dövlətləri Liqasının Baş katibi Nabil Fəhmi Kolumbiyanın qərarının hüquqi qüvvəyə malik olmadığını bildirib.
O, işğal yolu ilə əldə edilən suverenliyin beynəlxalq hüquq baxımından legitim sayıla bilməyəcəyini qeyd edərək, Kolumbiya hökumətini qərarına yenidən baxmağa çağırıb.
Körfəz Əməkdaşlıq Şurasının Baş katibi Casim Məhəmməd əl-Budeyvi isə belə tanınma aktlarının regionda sülh və təhlükəsizliyin təmin olunmasına yönəlmiş səylərə zərər vurduğunu bildirib.
Xatırladaq ki, Kolumbiya hökuməti avqustun 10-da işğal altındakı Suriya ərazisi olan Qolan təpələri üzərində İsrailin suverenliyini tanıdığını açıqlayıb.
