OMM Redaksiyası
Cənubi Afrika Respublikasının Keyptaun şəhərində üç ayrı silahlı hücum baş verib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Bildirilib ki, nəticədə 11 nəfər həyatını itirib.
Cənubi Afrika Polis Xidmətinin (SAPS) açıqlamasında bildirilib ki, şəhərin Khayelitsha, Langa və Gugulethu rayonlarında baş verən silahlı hücumlarla bağlı araşdırma başlanılıb.
Khayelitsha rayonunun Lingelethu West ərazisində baş verən hücum zamanı 25, 31 və 35 yaşlarında üç kişi güllələnərək öldürülüb.
Langa rayonunun KwaLanga ərazisində, Winnie Mandela küçəsində törədilən hücum nəticəsində isə dörd kişi və bir qadın həyatını itirib.
Gugulethu rayonundakı Barcelona qeyri-qanuni yaşayış məntəqəsində baş verən üçüncü hücum zamanı iki kişi və bir qadın öldürülüb, daha iki nəfər isə yaralanıb.
Polis hücumların baş verdiyi ərazilərə, eləcə də riskli hesab edilən digər məntəqələrə əlavə qüvvələrin göndərildiyini açıqlayıb.
Qeyd olunub ki, hücumların səbəbi hələlik müəyyən edilməyib.
Cinayətkarların tutulmasına imkan verəcək məlumat üçün 100 min Cənubi Afrika randı (təxminən 6 min ABŞ dolları) mükafat veriləcəyi açıqlanıb.
Hücumlarla bağlı hələlik heç kimin saxlanılmadığı bildirilib.
