“İran İslam Respublikasının Naxçıvan Muxtar Respublikası ərazisinə dron hücumu molla rejiminin nankorlugu və riyakarlığı kimi qiymətləndirilməlidir”.
Bu sözləri "Operativ Məlumat Mərkəzi-OMM"-ə açıqlamasında Milli Məclisin deputatı Vüqar Bayramov bildirib:
“Eyni zamanda, mülki infrastrukturun hədəf alınması qorxaqlığın və acizliyin nümunəsidir”.
Millət vəkili qeyd edib ki, baş vermiş hücum beynəlxalq hüququn norma və prinsiplərini kobud şəkildə pozur və regionda gərginliyin artmasına səbəb olacaq.
Qarşı tərəf qısa müddət ərzində dərhal açıqlama verməli və bu kimi halların baş verməməsi üçün zəruri addımlar atmalıdır.
“Mülki infrastruktura, o cümlədən məktəb binasına edilən hücum birmənalı olaraq terror aktıdır. İrandaki molla rejimi daim azərbaycanlılara qənim kəsilib, onların hüquqlarını əlindən alıb və orada yaşayan soydaşlarımızı daim təzyiq altında saxlayıb. Azərbaycan tərəfi bu riyakar hücuma cavab vermək hüququnu özündə saxlayır və qarşı tərəf mütləq öz cavablarını alacaq”,- deyə Vüqar Bayramov vurğulayıb.
