OMM Redaksiyası
İran ABŞ-nin neft tankerlərinə hücumlarından sonra vəd etdiyi “daha sürətli, daha ağır və daha ağrılı” cavabı verdiyini bildirib. İran İslam İnqilabı Keşikçiləri Korpusu (SEPAH) çərşənbə günü səhər saatlarında bölgədəki ABŞ bazalarının və maraqlarının hədəfə alındığını açıqlayıb.
SEPAH-ın məlumatına görə, hücumlar İordaniyadakı “Əl-Əzraq” aviabazasına, qanadlı və “Aegis” raketləri daşıyan iki ABŞ esminesinə, eləcə də Fars körfəzində iki ABŞ kommersiya gəmisinə qarşı həyata keçirilib.
SEPAH-ın dəniz qüvvələrinin Fars körfəzində iki ABŞ gəmisini və səkkiz neft tankerini hədəfə aldığı bildirilib. “Sepah News”un yaydığı açıqlamaya əsasən, boğazın təhlükəli ərazilərindən ABŞ Hərbi Dəniz Qüvvələrinin müşayiəti ilə keçməyə çalışan daha 10 gəmiyə də zərbə endirilib.
SEPAH ayrıca bəyan edib ki, aerokosmik qüvvələr bölgədə qanadlı və “Aegis” raketləri ilə təchiz edilmiş iki esminesə ballistik raketlərlə hücum edib. İordaniyada isə ABŞ qırıcılarının texniki xidmət hangarları və onların yerləşdirilməsi üçün istifadə olunan sığınacaqların hədəfə alındığı açıqlanıb.
İran Xarici İşlər Nazirliyi çərşənbə günü ABŞ-nin İranın beş neft tankerinə hücumunu kəskin pisləyib. Nazirlik bu addımları ABŞ-nin İrana qarşı hərbi təcavüzünün, dəniz blokadasının və iqtisadi müharibəsinin davamı kimi qiymətləndirərək, BMT Nizamnaməsi və beynəlxalq hüququn açıq şəkildə pozulduğunu bildirib.
İran tərəfi ölkənin suverenliyini və milli maraqlarını qorumaqda qətiyyətli olduğunu vurğulayıb. Bəyanatda İran Silahlı Qüvvələrinin hərbi təcavüzə qarşı özünümüdafiə hüququndan istifadə etməkdən çəkinməyəcəyi və düşmənin hər hansı hücumuna uyğun şəkildə qəti cavab verəcəyi qeyd olunub.
Hadisələr İran-İraq müharibəsi zamanı 1980-ci illərdə yaşanan və “Tanker müharibəsi” adlandırılan qarşıdurmanı xatırladır. Strateji əhəmiyyətli Hörmüz boğazında tərəflərin neft tankerlərinə qarşı qarşılıqlı hücumları regionda gərginliyi daha da artırıb.
