OMM Redaksiyası
İoannis Diamantakos Azərbaycan qadın basketbol millisinin baş məşqçisi və bütün yaş qrupları üzrə qadın milli komandalarının koordinatoru təyin olunub.
Azərbaycan Basketbol Federasiyası yunanıstanlı mütəxəssislə iki illik müqavilə imzalayıb. Diamantakos son olaraq Səudiyyə Ərəbistanının “AlUla” klubunda baş məşqçi kimi çalışıb.
Mütəxəssis daha əvvəl Livan Basketbol Federasiyasında texniki koordinator, ölkənin qadınlardan ibarət əsas milli komandasının, həmçinin U18 oğlan və qız yığmalarının baş məşqçisi olub. O, Fələstin kişilərdən ibarət əsas milli komandasına və Rumıniyanın U20 yığmasına da rəhbərlik edib.
Diamantakosun klub karyerası Yunanıstan, Rumıniya, Fələstin və Səudiyyə Ərəbistanı ilə bağlıdır. Onun qazandığı nəticələr arasında FIBA Asiya Kubokunun B divizionunda və U18 WABA turnirində gümüş medallar, Fələstin Basketbol Liqasında çempionluq və Yunanıstanda iki liqa titulu var.
Psixologiya üzrə fəlsəfə doktoru elmi dərəcəsinə malik olan baş məşqçinin əsas hədəfi 2026-cı ilin noyabrında və 2027-ci ilin fevralında keçiriləcək 2029-cu il qadınlar arasında Avropa çempionatının ilkin seçmə mərhələsində rəqabətədavamlı çıxış etməkdir.
