OMM Redaksiyası
İndoneziyada 60 valideyn hökumətin pulsuz məktəb yeməkləri proqramı çərçivəsində paylanan qidalardan sonra uşaqlarının xəstələnməsi ilə bağlı polisə müraciət edib. Bu, Prezident Prabovo Subiantonun əsas siyasətlərindən biri olan proqramla bağlı ilk hüquqi etirazdır.
Şikayət proqramı icra edən İndoneziya Milli Qidalanma Agentliyinə, yeməkləri hazırlayan mətbəxə və qidaları şagirdlərə paylayan məktəblərə qarşı verilib. Müraciət avqustun 31-də təqdim olunsa da, media ilə yalnız cümə axşamı günü paylaşılıb.
Valideynlərdən biri Fitri Sijabatın sözlərinə görə, Şimali Sumatranın Karo bölgəsində bir neçə orta məktəbdə ən azı 300 şagird avqustun ortalarında pulsuz yeməkləri yedikdən sonra xəstələnib. Bəzi şagirdlər xəstəxanaya yerləşdirilib.
Fitri Sijabatın 17 yaşlı qızı Aqnes də zərərçəkənlər arasındadır. O, xəstəxanaya aparılıb və növbəti gün evə buraxılıb. Lakin bir neçə gün sonra ürəkbulanma, qaşınma və keyimə şikayətləri ilə yenidən xəstəxanaya yerləşdirilib. Aqnes bir ay ərzində dörd dəfə xəstəxanada müalicə alıb.
“Ümid edirəm ki, onlar proqramı dayandıracaqlar. Uşaqlarımız bu vəziyyətə düşürsə, dövlət büdcəsini niyə boş yerə xərcləmək lazımdır?” – Fitri deyib.
Valideynlərin vəkili Aslia Sijabat bildirib ki, şikayətdə mümkün səhlənkarlıqla bağlı araşdırma aparılması, təqsirləndirilən şəxslərin müəyyənləşdirilməsi, cinayət ittihamlarının irəli sürülməsi və zərərçəkən ailələrə kompensasiya ödənilməsi tələb olunur.
Hazırda konkret şəxs şübhəli qismində göstərilməyib və xüsusi cinayət ittihamı irəli sürülməyib. Vəkil həmçinin bildirib ki, valideynlər hökumətə qarşı ayrıca iddia hazırlayır və bu işin yaxın vaxtlarda rayon məhkəməsinə təqdim edilməsi planlaşdırılır.
“The Jakarta Post” qəzetinin məlumatına görə, Karo polisi qida nümunələri üzrə Şimali Sumatra polisinin məhkəmə-tibbi laboratoriyasında aparılan ekspertizanın nəticələrini gözləyir. Polis sözçüsü Pedoman Maha bildirib ki, müstəntiqlər şagirdləri, müəllimləri və qidalanma üzrə mütəxəssisi də dindirirlər.
Karo hadisəsi İndoneziyada proqramla bağlı ilk kütləvi zəhərlənmə halı deyil. Son həftələrdə ölkənin müxtəlif bölgələrində pulsuz yeməkləri qəbul etdikdən sonra çoxsaylı insanların xəstələndiyi bildirilib. Yalnız ötən həftə bir neçə əyalətdə 2 mindən çox insanın bu yeməklərdən sonra səhhətində problem yaranıb.
Proqram Prezident Prabovo Subiantonun seçki vədlərindən biri olub. Cari mərhələ üçün layihəyə 229 trilyon İndoneziya rupisi, yəni təxminən 13 milyard dollar vəsait ayrılıb. Məqsəd ölkə üzrə 83 milyon məktəbli uşağı və hamilə qadını qida ilə təmin etməkdir.
Proqramın büdcəsi artıq bir dəfə azaldılıb, iki rəhbər dəyişdirilib. Rəhbərlərdən biri isə korrupsiya ittihamları ilə polis nəzarətindədir. Proqramın fəaliyyətə başlamasından sonra idarəetmədə pozuntular və korrupsiya ilə bağlı ittihamlar səslənib. İndiyədək 50 mindən çox qida zəhərlənməsi hadisəsinin proqramla əlaqələndirilməsi onun təhlükəsiz və davamlı şəkildə icra olunması ilə bağlı suallar yaradıb.
