OMM Redaksiyası
Fars Körfəzi Ərəb Dövlətləri Əməkdaşlıq Şurasına (KƏƏŞ) üzv ölkələrin xarici işlər nazirləri onlayn məsləhətləşmə görüşündə Hörmüz boğazında gəmiçiliyin təhlükəsizliyinin təmin olunmasını müzakirə ediblər.
“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.
Bildirilib ki, görüş iştirakçıları boğazda gəmiçiliyin azadlığı və təhlükəsizliyi ilə bağlı məsələlər üzrə Şuraya üzv ölkələr arasında koordinasiya və məsləhətləşmələrin gücləndirilməsi yollarını nəzərdən keçiriblər.
Nazirlər beynəlxalq hüquqa uyğun olaraq tranzit hüququnun təmin edilməsinin, habelə bütün sahilyanı dövlətlərin suveren hüquqlarına hörmət edilməklə gəmilərin və ticarət yüklərinin fasiləsiz hərəkətinin vacibliyini vurğulayıblar.
Videokonfrans formatında keçirilən görüşdə Qətərin Baş naziri və xarici işlər naziri Şeyx Məhəmməd bin Əbdülrəhman Əl Tani də iştirak edib.
Tərəflər həmçinin regionda aparılan danışıqların hazırkı mərhələsi və gərginliyin azaldılması məqsədilə əldə olunması nəzərdə tutulan razılaşmalar ətrafında fikir mübadiləsi aparıblar.
Xarici işlər nazirləri problemlərin həllində siyasi və diplomatik üsullara üstünlük verilməsinin, eləcə də bütün tərəflər arasında etimadın möhkəmləndirilməsi üçün birgə səylərin davam etdirilməsinin vacibliyini qeyd ediblər.
