Qətərin Baş naziri və Xarici İşlər naziri Məhəmməd bin Əbdürrəhman Al Sani rəsmi səfərlə İranın paytaxtı Tehrana yola düşüb.
“Operativ Məlumat Mərkəzi – OMM” xəbər verir ki, bu barədə Qətər Xarici İşlər Nazirliyinin rəsmi nümayəndəsi Macid əl-Ensari sosial media hesabında məlumat yayıb.
Səfər çərçivəsində Al Saninin İran rəsmiləri ilə bir sıra görüşlər keçirməsi planlaşdırılır. Danışıqlarda əsas diqqətin regionda gərginliyin azaldılması və dialoq üçün imkanların araşdırılmasına yönəldiləcəyi bildirilir.
Müzakirələrin əsas mövzularından birinin Hörmüz boğazındakı vəziyyət olacağı gözlənilir.
Qətər tərəfi münaqişələrin həllində əsas yolun diplomatiya və dialoq olduğunu vurğulayır.
Bu çərçivədə Hörmüz boğazında gəmiçilik azadlığının təmin edilməsi və dəniz keçidlərinin fevralın 28-dək mövcud olan vəziyyətə qaytarılması məsələsinin də görüşlər zamanı müzakirə olunacağı bildirilir.
