OMM Redaksiyası
Livanın "Hizbullah" qruplaşması İsrail hərbçilərinin cəmləşdiyi əraziyə kütləvi zərbə endirdiyini bəyan edib.
"Operativ Məlumat Mərkəzi-OMM" xəbər verir ki, bu barədə hərəkatın "Telegram" kanalında yayımlanan rəsmi açıqlamasında məlumat verilib.
Gecə saatlarında baş tutan əməliyyat zamanı İsrail ordusunun yeni yaradılmış Nimr əl-Camal mövqeyi hədəf alınıb.
Təşkilatın məlumatına görə, hücum çox sayda zərbə PUA-larının (pilotsuz uçuş aparatları) iştirakı ilə həyata keçirilib və hədəflərin dəqiq vurulduğu təsdiqlənib.
Qruplaşma nümayəndələri qeyd edirlər ki, bu addım atəşkəs rejiminin pozulmasına cavab olaraq atılıb.
Həmçinin, Livanın cənubunda dinc sakinlərə edilən hücumlar və onların evlərinin dağıdılması da əməliyyatın əsas səbəbləri kimi göstərilir.
Xatırladaq ki, hələ aprelin 17-də Livan hərəkatı atəşkəs pozulacağı təqdirdə İsrailə qarşı sərt tədbirlər görəcəyi barədə xəbərdarlıq etmişdi.
