OMM Redaksiyası
Azərbaycan Kubokunun ikinci təsnifat mərhələsində “Gəncəbasar” “Xankəndi”ni 3:2 hesabı ilə məğlub edib. “Gəncəbasar”ın baş məşqçisi Elhad Nəziri oyundan sonra futbolçularının çıxışından razı qaldığını deyib.
Nəziri bildirib ki, komandası xüsusilə ikinci hissədə meydanda oynamaq istədiyi futbolu nümayiş etdirib. Start heyətində böyük rotasiyalara əl atdıqlarını və heyətin 90 faizini dəyişdiklərini söyləyən məşqçi bunun futbolçuların fiziki və taktiki hazırlığını mərhələli şəkildə yaxşılaşdırmaq məqsədi daşıdığını vurğulayıb. Bu səbəbdən oyunu iki hissəyə böldüklərini qeyd edib.
Baş məşqçinin sözlərinə görə, komanda öz səhvləri nəticəsində qollar buraxıb və bu istiqamətdə işləyəcək. O, futbolçuların çempionat matçlarında daha məsuliyyətli davrandığını, qarşılarına qoyulan bir hədəfə çatmaq istədiklərini bildirib.
Nəziri ikinci hissədə rəqibə futbol oynamaq imkanı vermədiklərini söyləyib. Futbolçuların yerdə uzanaraq vaxt aparmasının və hakim qərarlarına etirazların oyunun intensivliyinə təsir etdiyini deyən məşqçi, buna baxmayaraq, oyunçularından istədiyi nəticəni aldığını bildirib. O, futbolçularını təbrik edib, onlarla fəxr etdiyini söyləyib, həmçinin rəhbərliyə və azarkeşlərə təşəkkür edib. Nəziri rəhbərliyin komandaya daim dəstək olduğunu və onların çəkilən zəhmətin qarşılığını vermək üçün çalışdıqlarını əlavə edib.
