OMM Redaksiyası
Braziliyada prezident seçkisinə həftələr qalmış sağçı namizəd Flavio Bolsonaro ilə bağlı korrupsiya və çirkli pulların yuyulması araşdırması genişlənib. İyulun 2025-ci ildə açılan və məhkəmə sənədlərinin məxfilikdən çıxarılması ilə üzə çıxan istintaq keçmiş prezident Jair Bolsonaro haqqında çəkilən “Dark Horse” filminin maliyyələşdirilməsinə yönəlib.
Federal müstəntiqlər filmin istehsalına ayrılan vəsaitin Banco Master-in əsas səhmdarı, hazırda həbsdə olan bankir Daniel Vorcaro ilə əlaqəli qanunsuz maliyyə əməliyyatları nəticəsində əldə edilib-edilmədiyini araşdırırlar. Söhbət ofşor strukturlar və xarici hesablar vasitəsilə həyata keçirilmiş mümkün korrupsiya, çirkli pulların yuyulması və qanunsuz valyuta əməliyyatlarından gedir.
Polisin əldə etdiyi məlumatlara əsasən, Flavio Bolsonaro filmin maliyyələşdirilməsi üçün Vorcarodan dəstək istəyib və istehsalın davam etməsi üçün ödənişlərin sürətləndirilməsinə çalışıb. Hakimiyyət orqanları 2025-ci ildə layihəyə təxminən 61 milyon real, yəni 12 milyon dollar vəsait yönəldildiyini bildirirlər.
Flavio Bolsonaro hər hansı qanunsuzluq ittihamını rədd edib. Manaus şəhərində seçki tədbirindən sonra danışan namizəd filmin yalnız özəl sponsorlar tərəfindən maliyyələşdirildiyini və bütün əməliyyatların qanuna uyğun aparıldığını deyib. O, “Gizlədəcək heç nəyim yoxdur”, - deyə bildirib.
Banco Master işi ilə əlaqə araşdırılır
İttihamlar Braziliya tarixində ən böyük maliyyə fırıldaqlarından biri kimi qiymətləndirilən Banco Master işi çərçivəsində irəli sürülüb. İstintaq Vorcaro ilə yüksək vəzifəli qanunvericilər, Mərkəzi Bank rəsmiləri, hökumət nümayəndələri və məhkəmə üzvləri arasındakı mümkün əlaqələri də araşdırır.
Müstəntiqlər filmlə əlaqəli vəsaitlərin Flavio Bolsonaronun qardaşı, onun əsas siyasi müttəfiqi və kampaniyasının məsləhətçisi Eduardo Bolsonaro ilə bağlı qurumlara köçürülüb-köçürülmədiyini də müəyyənləşdirməyə çalışırlar. Sənədlərdə milyonlarla dolların Eduardoya bağlı ABŞ investisiya strukturuna köçürüldüyü qeyd olunur.
Hər iki qardaş ittihamları rədd edib. Eduardo Bolsonaro xarici maliyyə strukturlarından istifadənin vəsaitləri gizlətmək deyil, onları mümkün məhkəmə müdaxiləsindən qorumaq məqsədi daşıdığını bildirib. “Bunu rüşvət pulu kimi təqdim etmək istəyirlər, amma belə deyil”, - deyə o vurğulayıb.
Araşdırmanın seçkiyə təsiri qeyri-müəyyəndir
İstintaq Braziliyada son illərin ən rəqabətli prezident seçkilərindən biri ərəfəsində başlayıb. Son sorğular ikinci turda Luiz İnasio Lula da Silvanın 46 faiz, Flavio Bolsonaronun isə 44 faiz dəstəyə malik olduğunu göstərir. Lakin nəticələr sorğunun xəta payı daxilindədir və mübarizənin son dərəcə yaxın keçəcəyi gözlənilir.
Siyasi analitiklər bildirirlər ki, qərarsız və dəyişkən seçicilər arasında kiçik meyil də seçkinin nəticəsini müəyyənləşdirə bilər. Flavio Bolsonaro araşdırmanı siyasi motivli adlandıraraq tam şəffaflığa çağırıb. Lula isə məsələdən məsafə saxlamağa çalışsa da, istintaqın açıq aparılmasını dəstəkləyib.
Jair Bolsonaronun 2022-ci il seçkilərindən sonra baş verən hadisələrdəki roluna görə həbs cəzası çəkməsinə baxmayaraq, Bolsonaro ailəsi Braziliyanın sağ siyasi düşərgəsində təsirini qoruyur. Yeni sənədlərin açıqlanması Flavio Bolsonaronu seçki kampaniyasının son həftələrində həm ittihamlara cavab vermək, həm də siyasi dəstəyini qorumaq vəzifəsi ilə üz-üzə qoyub.
