OMM Redaksiyası
Gənclər və idman naziri Fərid Qayıbov ötən ay beynəlxalq yarışlarda yüksək nəticələr göstərən idmançılarla görüşüb. Tədbir Azərbaycan İdman Akademiyasında Dövlət Himninin səsləndirilməsi ilə başlayıb.
Fərid Qayıbov çıxışında idmançıların beynəlxalq arenalarda qazandıqları uğurları yüksək qiymətləndirib, idmançıları və məşqçilərini təbrik edib. Nazir bildirib ki, oktyabr ərzində beynəlxalq yarışlarda Azərbaycanın Dövlət Himni 17 ölkədə səsləndirilib.
Oktyabrın medal göstəriciləri
İdmançılarımız ay ərzində ümumilikdə 51 qızıl, 43 gümüş və 74 bürünc medal qazanıblar.
Tədbirdə beynəlxalq yarışlarda əldə edilmiş nailiyyətləri əks etdirən videoçarx nümayiş olunub. Bir sıra idman növlərinin nümayəndələri qatıldıqları yarışlar və nəticələri barədə məlumat veriblər.
Görüşdə Fərid Qayıbovun mentoru olduğu “Yüksəliş” müsabiqəsinin qalibi, Ədliyyə Nazirliyinin Tibb baş idarəsinin poliklinikasının rəisi Ramil Hüseynzadə də iştirak edib. Sonda nazir idmançılara qarşıdakı yarışlarda uğurlar və qələbələr arzulayıb.
