OMM Redaksiyası
“Qəbələ”nin futbolçusu Elvin Camalov “Zirə”yə 1:2 hesabı ilə məğlub olduqları oyunda komandasının bir xal qazanmağa yaxın olduğunu bildirib. O, sport24.az-a müsahibəsində ilk hissədə və ikinci hissənin əvvəlində yaxşı oynadıqlarını, qol imkanları yaratdıqlarını, lakin onlardan yararlana bilmədiklərini deyib.
Camalovun sözlərinə görə, matçın sonuna yaxın yorğunluq və müdafiəyə çəkilmələri rəqibin qol vurmasına şərait yaradıb. O, hesabı tez bərabərləşdirdiklərini, hətta önə keçmək imkanlarının olduğunu, amma ikinci hissədəki real qol fürsətindən istifadə edə bilmədiklərini söyləyib. Futbolçu səfərdə onları sona qədər dəstəkləyən azarkeşlərə təşəkkür edib və komandanın zamanla daha yaxşı olacağına inandığını vurğulayıb.
Camalov “Sumqayıt” və “Sabah”la oyunlarla müqayisədə inkişafın aydın göründüyünü, komandanın qol epizodları yaratdığını qeyd edib. Bununla belə, məşqçinin oyun sistemini komandaya aşılamaq üçün əlavə vaxta ehtiyac olduğunu deyib. O, hazırda əsas məqsədin aşağı pillələrdən uzaqlaşmaq və liqada qalmaq olduğunu bildirib. Qış fasiləsinədək çox xal toplasalar, mövsümün ikinci hissəsində əvvəlki “Qəbələ”yə bənzəyən komanda görə biləcəklərinə inandığını əlavə edib.
“Neftçi”dən az oyun şansı aldığı üçün ayrıldığını deyən futbolçu sabiq klubunda qalmaq və çempion olmaq istədiyini, lakin stabil oynamaq və milliyə dəvət almaq üçün qərar verdiyini söyləyib. Camalov “Qəbələ”də əsas heyətin daimi üzvünə çevrilməyi və milliyə çağırılmağı hədəfləyir. O, Emin Mahmudovun millidəki karyerasını bitirməsinə hörmətlə yanaşdığını, Mahmudovun Azərbaycan futbolu və “Neftçi” üçün böyük işlər gördüyünü, hələ də milliyə fayda verə biləcəyini düşündüyünü bildirib.
