“Qarabağ” Pedro Bikalyonun cərimələnməsi barədə məlumatı təkzib etdi

Son günlər mətbuatda “Qarabağ”ın futbolçusu Pedro Bikalyonun çəkisini azaltması üçün qarşısına xüsusi şərt qoyulduğu barədə məlumat yayılıb. İddialara əsasən, braziliyalı oyunçu verilən tapşırığın öhdəsindən gələ bilməyib.

Məlumatlarda əvvəlki fiziki formasını bərpa etməkdə çətinlik çəkən futbolçunun buna görə 10 min dollar, yəni 17 min AZN məbləğində cərimələndiyi qeyd olunub.

Məsələ ilə bağlı “Qarabağ”ın mətbuat xidməti məlumatı təkzib edib. Klubdan bildirilib ki, Pedro Bikalyonun cəzalandırılması barədə yayılan xəbərlər həqiqəti əks etdirmir.

Pedro Bikalyo 2025-ci ilin yayından “Qarabağ”da çıxış edir. Ağdam təmsilçisi braziliyalı futbolçu ilə əməkdaşlığı davam etdirmək qərarına gəlib və bu ilin iyununda onunla müqavilənin müddətini uzadıb. Tərəflərin imzaladığı yeni üçillik sözləşmə 2029-cu ilin yayına qədər qüvvədə olacaq.