OMM Redaksiyası
“Neftçi”nin baş icraçı direktoru Cenk Sümer futbolxeber.az-a müsahibəsində komandanın mövsümün sonunda çempion olmaq və kuboklar qazanmaq istədiyini bildirib. O, söhbətə Azərbaycan xalqını Zəfər Günü münasibətilə təbrik etməklə başlayıb, şəhidlərə rəhmət, qazilərə şəfa diləyib.
Sümer “Kəpəz” üzərində 1:0 hesablı qələbədən razı qaldığını, komandanın yaxşı oynadığını deyib. O, rəqibin mübarizəsini və azarkeşlərinin çempionata rəng qatmasını da qeyd edib. “Neftçi”nin ilk 11 turdakı çıxışını müsbət qiymətləndirən Sümer çempionatın uzun marafon olduğunu və hər matçda fərqli nəticənin mümkünlüyünü vurğulayıb.
Klub qışda qapıçı transferi üçün xüsusi axtarış aparmır, lakin skautlar müxtəlif ölkələrdə oyunları izləyir. Sümer transferlərin baş məşqçinin tələbinə, büdcəyə və klubun hədəflərinə uyğun olacağını bildirib. Yayda Varqasdan başqa 9 futbolçunun transfer edildiyini, ehtiyatdan meydana çıxan oyunçuların komandaya fayda verdiyini söyləyib.
Transfer qərarlarında mümkün zədələr və digər klublardan gələcək təkliflər nəzərə alınacaq. Sümer Emin Mahmudovun millidən ayrılmasına təəssüfləndiyini, onun “Neftçi”nin kapitanı və qiymətli futbolçusu olduğunu deyib. Breno Almeyda üçün Kiprdən təklif gəlib, lakin futbolçu ora getməyəcək. Sümer bombardir olan Almeydanın yaxşı mövsüm keçirdiyini qeyd edib.
Baş icraçı direktor azarkeşlərin tribunaları doldurmamasını klubun ən böyük problemlərindən biri adlandırıb. Fasilədə bu istiqamətdə işlərin görüləcəyini deyən Sümer “Kəpəz”lə matçda komandaya dəstək olan azarkeşlərə təşəkkür edib.
