OMM Redaksiyası
Azərbaycanın taekvondo millisinin baş məşqçisi Elnur Amanov Dakarda keçirilən IV Yeniyetmələrin Yay Olimpiya Oyunlarında komandanın çıxışını şərh edib. O, fikirlərini Heydər Əliyev Beynəlxalq Aeroportunda Olimpiya nümayəndə heyətinin qarşılanma mərasimində səsləndirib.
Amanov bildirib ki, Azərbaycan millisi turnirdə sonadək mübarizə aparıb. Baş məşqçinin sözlərinə görə, Adil Kazımlı finala gedən yolda gərgin görüşlər keçirib və həlledici qarşılaşmaya qədər rəqibləri arasında afrikalı idmançılar da olub.
Baş məşqçi finalda İordaniya təmsilçisi ilə qarşılaşan Kazımlının qızıl medal qazanmaq imkanını əldən verdiyini deyib. «Adil qızıl medalın bir addımlığında təşəbbüsü əldən verdi. Bununla belə, gümüş medal da yüksək nəticədir. Əminəm ki, gələcəkdə daha böyük uğurlar qazanacağıq», – deyə Amanov bildirib.
Adil Kazımlı 73 kq çəki dərəcəsində gümüş medal qazanıb. Azərbaycan millisi Dakar Olimpiadasını ümumilikdə altı medalla – üç qızıl və üç gümüş mükafatla başa vurub.
