OMM Redaksiyası
AnewZ-nin məlumatına görə, Rusiya və Ukraynanın qarşılıqlı zərbələr endirdiyi çərşənbə gecəsi Litva, Latviya, Estoniya və Finlandiya dronlarla bağlı xəbərdarlıq yayıb, müvəqqəti təhlükəsizlik məhdudiyyətləri tətbiq edib. Bu, münaqişənin qonşu NATO ölkələrinə yayılması ilə bağlı narahatlığı artırıb.
Baltik ölkələrinin hakimiyyət orqanları hava məkanlarına yaxın ərazidə naməlum dronların müşahidə olunmasından sonra sakinləri sığınacaqlara getməyə çağırıb. Dronların Rusiya və Belarus istiqamətindən yaxınlaşdığı bildirilib. Xəbərdarlıqlar bir neçə saat sonra ləğv edilib, xəsarət alan olmayıb.
Xəbərdarlıqlar bölgəyə yayıldıqca NATO qırıcıları havaya qaldırılıb. Litvanın ikinci böyük şəhəri olan, təxminən 300 min sakinin yaşadığı Kaunas da xəbərdarlıq əhatəsinə düşüb.
Litvanın Baş naziri Mindaugas Sinkevičius gecəni “çətin gecə” adlandıraraq, bölgə üzrə dörd dronun aşkar edildiyini bildirib.
Litvanın şimalında dronu vurmağa cəhd edilib. Daha sonra NATO raketinə aid qalıqlar yerdə tapılıb. Dronun vurulub-vurulmadığı aydın olmayıb.
Finlandiya Finlandiya körfəzinin şərq hissəsində hava məkanına və dəniz fəaliyyətinə müvəqqəti məhdudiyyətlər qoyub. Finlandiya Müdafiə Qüvvələri tədbirlərin ictimaiyyəti qorumaq və qurumların əməliyyat aparmasına şərait yaratmaq məqsədi daşıdığını bildirib. Məhdudiyyətlər sonradan ləğv edilib.
Finlandiya Müdafiə Qüvvələrinin açıqlamasında bildirilib ki, şərqi Finlandiya körfəzində müvəqqəti aviasiya məhdudiyyət zonası saat 02:09-da, dəniz ərazisinə dair məhdudiyyət isə saat 02:15-də tətbiq olunub.
Rusiya və Ukrayna qarşılıqlı zərbələr endirib
Xəbərdarlıqlar Ukrayna dronlarının Baltik dənizindəki əsas ixrac obyektlərinin və neft emalı zavodunun yerləşdiyi Rusiyanın şimal-qərbinə hücum etdiyi vaxt verilib.
Zərbələr nəticəsində Ust-Luqa limanı ərazisində yanğın baş verib, üç nəfər yaralanıb. Belarusla sərhəd yaxınlığındakı Smolensk vilayətində isə dron qalıqlarının düşməsi iki nəfərin ölümünə səbəb olub. Rusiya xəbər agentlikləri bu məlumatı vilayət qubernatoruna istinadən yayıb.
Rusiya hava zərbələri Ukraynanın bir neçə bölgəsini hədəf alıb. Böyük sənaye şəhəri Krivoy Roqun bəzi hissələrində elektrik enerjisi kəsilib. Rəsmilər Xarkovda bir nəfərin yaralandığını, Zaporojyedə isə daha altı nəfərin xəsarət aldığını bildirib.
“Reuters” hadisələrlə bağlı yayılan məlumatları müstəqil şəkildə təsdiqləyə bilmədiyini qeyd edib. Rusiya və Ukrayna mülki şəxsləri qəsdən hədəf aldıqlarını inkar edir.
Əbu-Dabidə sülh danışıqları davam edir
Gərginliyin artması Rusiya və Ukrayna rəsmilərinin çərşənbə axşamı başlayan və iki gün davam etməsi nəzərdə tutulan sülh danışıqları üçün Əbu-Dabidə olduğu vaxta təsadüf edib. ABŞ müharibəyə son qoymaq məqsədilə diplomatik səylərini yenidən gücləndirir.
ABŞ Prezidenti Donald Tramp sülh razılaşmasının əldə olunmasının yaxın olduğunu deyib və münaqişəyə son qoyulmasının daha geniş Avropa regionunu əhatə edə biləcəyini bildirib.
Ukraynanın Baltik dənizindəki Rusiya neft ixracı obyektlərinə davam edən dron hücumları qonşu NATO üzvlərinin təhlükəsizlik narahatlığını artırıb. Bəzi dronların istiqamətdən yayındığı barədə məlumatlar da narahatlığı gücləndirib.
Moskva Kiyevi Rusiya ərazisinə hücumlar üçün NATO hava məkanından istifadə etməkdə ittiham edib. Ukrayna isə Rusiyanın elektron maneələrinin bəzi dronları istiqamətdən yayındığını bildirir.
NATO üzvü olan ölkələr daha geniş təhlükəsizlik böhranına görə Rusiyanı məsul tutub və bunu Rusiyanın 2022-ci ilin fevralında Ukraynaya müdaxiləsi ilə əlaqələndirib.
