Afət Ziyadqızı
2022-2023-cü illərdə Avropada rusiyalı müəlliflərin 170-ə yaxın kitabı oğurlanıb və nəticədə 3,3 milyon dollar ziyan dəyib.
"Operativ Məlumat Mərkəzi-OMM" xəbər verir ki, bu barədə “The Guardian” qəzeti məlumat yayıb.
Qəzetin yazdığına görə, kitablar Almaniya, Latviya, Litva, Polşa, Finlandiya, Fransa, Çexiya, İsveçrə və Estoniya kitabxanalarından oğurlanıb. Oğrular əsasən Aleksandr Puşkinin (1799-1837) əsərlərini oğurlayıblar. 2022-ci ilin dekabrında Latviya hüquq-mühafizə orqanları DNT analizindən istifadə edərək şübhəli şəxsi müəyyən ediblər. Şübhəlinin Gürcüstan vətəndaşı Beqa Tsirekidze olduğu məlum olub. Ondan Vyana, Vilnüs, Kiyev, Münhen və Parisdən kitabların bərpası üçün alətlər və kitabxana kartları götürülüb.
“The Guardian” yazır ki, Tsirekidze əvvəllər oğurluğa görə məhkum edilib və antikvar ticarətində iş təcrübəsi olub. O, təkbaşına və ya cinayətkar qrupun tərkibində fəaliyyət göstərdiyini söyləməkdən imtina edib və cinayətin sifarişçilərinin və ya təşkilatçılarının adlarını çəkməkdən imtina edib. 2023-cü ildə Polşada daha iki şübhəli saxlanılıb.
