İsrailin keçmiş müdafiə naziri Aviqdor Liberman İran və ABŞ arasında əldə edilən razılaşmanı kəskin tənqid edib. Buna səbəb, onun fikrincə, sözügedən müqavilənin İsrailin milli təhlükəsizlik maraqlarına birbaşa təhdid yaratması olub.
"Operativ Məlumat Mərkəzi-OMM" xəbər verir ki, bu barədə məlumat siyasətçinin rəsmi açıqlamalarına istinadən hazırlanan hesabatda yer alıb.
Məlumata görə, bazar ertəsi günü bəyanat yayan keçmiş nazir bu razılaşmanı "İsrail dövlətinin yaranmasından bəri ən böyük diplomatik fəlakət" kimi qiymətləndirib.
Aviqdor Liberman özünün "X" (keçmiş Twitter) sosial şəbəkəsindəki hesabında etdiyi paylaşımda Ağ Evin yürütdüyü siyasətdən narazılığını ifadə edərək ölkə rəhbərliyinə çağırış edib. O bildirib ki, Təl-Əviv qlobal iqtisadi amilləri deyil, öz təhlükəsizliyini ön plana çıxarmalıdır:
“Biz dünya bazarlarındakı yanacaq qiymətlərinə görə deyil, İsrailin maraqlarına uyğun hərəkət etməliyik”.
