Livan Prezidenti Cozef Aun ABŞ və Qətərin bütün regional cəbhələrdə, o cümlədən Livanın cənubunda atəşkəsin gücləndirilməsi səylərini dəstəkləyib. Buna səbəb, regionda hərbi əməliyyatların yenidən başlamasının qarşısını almaq və davamlı sülhə nail olmaq cəhdləridir.
"Operativ Məlumat Mərkəzi-OMM" xəbər verir ki, bu barədə məlumat Livan Prezident Aparatının yaydığı rəsmi hesabatda yer alıb.
Məlumata görə, Prezident Aun bu məqsədlə ABŞ-nin vitse-prezidenti J.D. Vens, Amerika liderinin kürəkəni Cared Kuşner və Qətərin Baş naziri, eyni zamanda xarici işlər naziri Şeyx Məhəmməd bin Əbdürrəhman Əl-Tani ilə telefon danışıqları aparıb.
Prezident ofisinin bəyanatında qeyd olunur:
"Aparılan müzakirələr zamanı hərbi əməliyyatların yenidən başlamasının qarşısını almaq üçün əlaqələndirici orqanın yaradılması ehtimalı müzakirə edilib. Prezident Aun davamlı atəşkəsə töhfə verəcək bütün tədbirləri təsdiqləyib və atəşkəs monitorinq mexanizminin hazırlanmasını dəstəkləyib."
Hesabatda bildirilir ki, bundan əvvəl Bürgenstokda keçirilən dördtərəfli məsləhətləşmələrdə iştirak edən danışıqlar qrupları Livan da daxil olmaqla münaqişələrin həlli üçün xüsusi işçi qrupu yaratmaq barədə razılığa gəliblər. ABŞ və İran arasında vasitəçilik edən Qətər və Pakistanın birgə bəyanatında isə Livan nümayəndələrinin bu qurumun işinə cəlb ediləcəyi vurğulanıb.
Digər tərəfdən, ABŞ-non himayəsi altında keçirilən Livan-İsrail danışıqlarının beşinci raundunun 23-25 iyun tarixlərində Vaşinqtonda baş tutacağı gözlənilir. "Əşarq əl-Əvsət" qəzetinin yaydığı məlumata görə, diplomat Simon Kərəmin rəhbərlik etdiyi Livan nümayəndə heyəti danışıqlarda mühüm şərt irəli sürəcək. Beyrut, Litani çayının cənubundakı ərazini "təhlükəsiz və silahsız zonaya" çevirmək öhdəliyi müqabilində İsrail qoşunlarının cənub bölgələrindən tamamilə çıxarılması üçün konkret cədvəlin müəyyən edilməsində israr edir.
