OMM Redaksiyası
Bakıda fəaliyyət göstərən xəbər otağından dünyanın müxtəlif ölkələrindəki auditoriyaya: “AnewZ” reportajlar, sənədli filmlər və rəqəmsal jurnalistika sahəsində fəaliyyətinin iki ilini qeyd edir.
“AnewZ” iki il əvvəl Cənubi Qafqazı dünyaya, dünyanı isə Cənubi Qafqaza daha yaxından tanıtmaq ideyası ilə fəaliyyətə başlayıb. Beynəlxalq xəbər kanalı 2024-cü il noyabrın 4-də Bakıda yayıma başlayaraq qlobal hadisələri işıqlandırmağı, eyni zamanda region, Mərkəzi Asiya və Yaxın Şərq barədə hekayə və baxışlara daha geniş yer ayırmağı hədəfləyib.
“AnewZ” hazırda dünyanın 50-dən çox şəhərindən xəbər verir və müxtəlif ölkələrdə 12 bürosu fəaliyyət göstərir. Jurnalistlər beynəlxalq münasibətlərə təsir edən münaqişə və diplomatiyadan tutmuş biznes, mədəniyyət və texnologiyaya qədər müxtəlif mövzuları izləyirlər.
Sərhədləri aşan reportajlar
“AnewZ”in yayıma başladığı ilk həftələr Bakıda keçirilən COP29-la eyni vaxta düşüb. Kanal tədbirin rəsmi media tərəfdaşı olub. Sonrakı dövrdə müxbirlər dünyanın müxtəlif bölgələrindən reportajlar hazırlayaraq baş verən hadisələri auditoriyaya çatdırıblar.
Suriyada “AnewZ” komandası ölkənin şimal-şərqində səfərdə olub, müharibə və siyasi dəyişikliklərin nəticələri ilə yaşayan icmalarla söhbət edib.
2026-cı ilin oktyabrında xüsusi müxbir Sabir Səfərov Ər-Riyaddakı Kral Xalid Beynəlxalq Hava Limanına hücumun baş verdiyi yerdən görüntülər çəkib. Həmin görüntülər BBC və “Al Jazeera” da daxil olmaqla beynəlxalq yayımçılar tərəfindən istifadə olunub.
Sənədli filmlər və rəqəmsal auditoriya
“AnewZ”in orijinal layihələri jurnalist və rejissorlara başlıqlardakı xəbərlərin arxasında duran amilləri araşdırmaq imkanı verir. “The Frontline” silsiləsi tamaşaçıları Liviyaya apararaq ölkədəki parçalanmanı və yenidənqurma cəhdlərini, həmçinin müharibənin mirasının milyonlarla insanın həyatına təsirini davam etdirdiyi Koreya yarımadasını əhatə edib.
2025-ci ilin dekabrında “AnewZ” araşdırmalar bölməsini səkkiz ölkədə çəkilən “The Oligarch’s Design” sənədli filmi ilə yaradıb. Digər araşdırmalarda humanitar qurumların münaqişələrdəki rolu, eləcə də Fransada hakimiyyət və nüfuzla bağlı məsələlər öyrənilib.
“AnewZ” beynəlxalq auditoriyaya az tanınan tarixi mövzuları da çatdırıb. Berlində premyerası keçirilən “Kontrapunkt” layihəsi iki əsrlik Almaniya-Azərbaycan tarixini araşdırıb. “The Aviators of Ganja” filmində isə İkinci Dünya müharibəsindən əvvəl Azərbaycanda təlim keçmiş ispan pilotların hekayəsi danışılıb.
Şəkinin canlı irsinə həsr olunan sənədli film Bakıda keçirilən BMT-nin Ümumdünya Şəhərsalma Forumunda nümayiş etdirilib. “Destination” silsiləsi isə tamaşaçıları Azərbaycan və Mərkəzi Asiyanın müxtəlif məkanlarına aparıb.
Televiziya yayımları ilə yanaşı, “AnewZ” rəqəmsal və sosial media platformalarında da fəaliyyətini genişləndirib. Kanal burada reportajlar, müsahibələr, izahlı materiallar və orijinal filmlər paylaşır.
Kanalın sosial media göstəricilərinə görə, 2025–2026-cı illərdə “AnewZ”in paylaşımları 1 milyard baxış toplayıb, izləyici sayı isə 660 min artıb.
Kanal mürəkkəb mövzuları izah etmək və etibarlı məlumatı yanlış məzmundan ayırmağa kömək etmək üçün fakt yoxlama və izahlı material formatları da hazırlayıb.
Xəbərlərin hazırlanması və istehlakı texnologiyanın təsiri ilə dəyişdikcə, “AnewZ” süni intellektin fəaliyyətinin müxtəlif istiqamətlərində istifadəsini araşdırır. Kanal xəbər otağındakı proseslərə dəstəkdən tutmuş vizual hekayəçiliyin və rəqəmsal məzmunun inkişafına qədər yeni alətlərdən yararlanır, bununla yanaşı redaksiya mühakiməsini və insan təcrübəsini əsasda saxlayır.
Hər yayımın, reportajın və layihənin arxasında komanda dayanır. Jurnalistlər, müxbirlər, aparıcılar, prodüserlər, operatorlar, redaktorlar, dizaynerlər, texniki heyət və təşkilatın digər əməkdaşları kanalın Bakıdan beynəlxalq xəbər otağına çevrilməsinə töhfə veriblər.
“AnewZ”in bəyanatında auditoriyaya müraciət edilərək kanalı izləyən, oxuyan, paylaşan və onunla birgə olan hər kəsə təşəkkür bildirilib. Kanalın iki illik fəaliyyəti ilə bağlı materialda “hekayənin davam etdiyi” vurğulanıb.
