Afət Ziyadqızı
Avropa İttifaqına (Aİ) üzv ölkələr Rusiya Federasiyasının hərbi-sənaye kompleksinə qarşı təxminən 1600 yeni məhdudlaşdırıcı tədbirdən ibarət genişmiqyaslı sanksiya paketini rəsmən qəbul ediblər. Bu barədə Aİ-nin xarici işlər və təhlükəsizlik siyasəti üzrə ali nümayəndəsi Kaja Kallas məlumat verib.
"Operativ Məlumat Mərkəzi-OMM" xəbər verir ki, K.Kallas "X" sosial şəbəkə hesabında paylaşım edərək, sözügedən qərarın Aİ xarici işlər nazirlərinin Lüksemburqda keçirilən iclası çərçivəsində qəbul edildiyini diqqətə çatdırıb.
Ali nümayəndənin sözlərinə görə, bu addım münaqişənin başladığı dövrdən bəri Aİ-nin sanksiya siyahılarının tətbiq etdiyi en böyük və əhatəli genişlənmədir. K.Kallas bu qərarla Avropa məkanının vahid siyasi iradə və sarsılmaz birlik nümayiş etdirdiyini xüsusi vurğulayıb.
Qəbul edilən məhdudiyyətlərin yarısından çoxu birbaşa ballistik raketlərin istehsalı və təchizatı zənciri ilə əlaqədar fiziki və hüquqi şəxsləri, həmçinin texnoloji komponentləri əhatə edir. Aİ rəsmisi bildirib ki, tətbiq olunan addımlar Rusiyanın hərbi sənaye potensialını zəiflətməyə, müasir silah sistemlərinin istehsalı prosesini xeyli çətinləşdirməyə, uzatmağa və maliyyə baxımından daha baha başa gəlməsinə yönəlib.
