Afət Ziyadqızı
Nigeriyanın şimal-qərbində yerləşən Zamfara ştatında naməlum silahlı dəstə tərəfindən dinc sakinlərə və təhlükəsizlik qüvvələrinə qarşı xain hücum təşkil olunub. Nigeriya milli mətbuatının yaydığı məlumata əsasən, silahlı şəxslər Gurusu-Gwashi avtomobil yolunda həftəlik regional bazara gedən mülki tacirlərin karvanını hədəfə alıblar.
"Operativ Məlumat Mərkəzi-OMM" xəbər verir ki, mülki şəxslərin təhlükəsizliyini təmin etmək məqsədilə karvan hərbi müşayiət altında hərəkət edirmiş. Silahlı pusu nəticəsində aralarında hərbçilərin və hüquq-mühafizə orqanları əməkdaşlarının da olduğu 27 nəfər həlak olub, çoxlu sayda insan müxtəlif dərəcəli xəsarətlər alıb.
Zamfara Ştat Polis İdarəsi faktı rəsmən təsdiqləyib və cinayətkar dəstə üzvlərinin zərərsizləşdirilməsi, eləcə də hadisənin təfərrüatlarının üzə çıxarılması istiqamətində genişmiqyaslı əməliyyat-istintaq tədbirlərinə başlanıldığını bəyan edib.
Qeyd edək ki, Nigeriyanın şimal və mərkəzi vilayətləri uzun müddətdir ki, mütəşəkkil silahlı cinayətkar dəstələrin, həmçinin "Boko Haram" və İŞİD-in Qərbi Afrika qolu (ISWAP) kimi radikal terror təşkilatlarının hücumlarına məruz qalır.
Ölkə qanunvericiliyində adamoğurluğu cinayətinə görə ölüm cəzası nəzərdə tutulsa da, fidyə tələbi ilə həyata keçirilən insan oğurluğu halları kəskin problem olaraq qalmaqdadır. Silahlı qruplaşmalar xüsusilə strateji nəqliyyat marşrutlarını, yaşayış məntəqələrini və təhsil müəssisələrini hədəf seçərək mülki şəxsləri girov götürməyə davam edirlər.
