Afət Ziyadqızı
Nigeriyanın Ciqava ştatında yağan güclü yağışlar və fırtına insan tələfatına və ciddi dağıntılara səbəb olub.
"Operativ Məlumat Mərkəzi-OMM" xəbər verir ki, bu barədə Fövqəladə Halların İdarə Edilməsi Agentliyinin (SEMA) ştat üzrə baş katibi Hannafi Faqam məlumat verib.
Məlumata görə, təbii fəlakət nəticəsində 7 nəfər həyatını itirib, 53 nəfər isə müxtəlif dərəcəli bədən xəsarətləri alıb.
Bildirilib ki, güclü fırtına nəticəsində 5 min 403 ev təsərrüfatına ziyan dəyib və minlərlə sakin evlərini tərk etmək məcburiyyətində qalıb.
Qeyd olunub ki, təbii fəlakət zamanı 47 ibtidai və orta məktəb, 3 xəstəxana, eləcə də 2 polis bölməsi ciddi zərər görüb.
Məlumata əsasən, ştat hökuməti zərərçəkən ailələr üçün müvəqqəti sığınacaqlar yaradıb, ərzaq və tibbi yardımın göstərilməsi istiqamətində tədbirlərə başlayıb.
Bildirilib ki, hazırda bölgədə dəymiş ziyanın və əhalinin ehtiyaclarının qiymətləndirilməsi prosesi davam edir.
