Afət Ziyadqızı
ABŞ Hərbi Dəniz Qüvvələrinə məxsus USS John F. Kennedy təyyarədaşıyan gəmisində baş verən atışma nəticəsində bir dənizçi həlak olub.
“Operativ Məlumat Mərkəzi-OMM” xəbər verir ki, bu barədə "Stars and Stripes" ABŞ Hərbi Dəniz Qüvvələrinin sözçüsünə istinadən məlumat yayıb.
Məlumata görə, hadisəni törətdiyi bildirilən dənizçi saxlanılıb. Lakin onun barəsində hələlik rəsmi ittiham irəli sürülməyib.
Bildirilir ki, hadisə hazırda Virciniya ştatının Nyuport-Nyus şəhərində limanda yerləşən USS John F. Kennedy gəmisində baş verib.
Qeyd edək ki, USS John F. Kennedy ABŞ Hərbi Dəniz Qüvvələrinin Gerald R. Ford sinfinə aid nüvə enerjisi ilə işləyən ikinci təyyarədaşıyan gəmisidir. Gəmi bu ilin fevral ayında ilk dəniz sınaqlarını uğurla başa vurub.
Hələ rəsmi olaraq Hərbi Dəniz Qüvvələrinə təhvil verilməyən təyyarədaşıyanın istismara verilməsinin 2027-ci ilin mart ayında həyata keçirilməsi planlaşdırılır.
