Afət Ziyadqızı
ABŞ administrasiyası Belarus, Honkonq, Çin və İrandan olan ümumilikdə 12 şəxs və şirkətə qarşı sanksiyalar tətbiq edib və ya mövcud məhdudiyyətləri genişləndirib.
"Operativ Məlumat Mərkəzi-OMM" xəbər verir ki, bu barədə “Armenpress” ABŞ Dövlət Departamentinin açıqlamasına istinadən məlumat yayıb.
Məlumata görə, sanksiyalar İslam İnqilabı Keşikçiləri Korpusuna (İİKK) mobil zenit-raket sistemlərinin tədarük edilməsi ilə bağlı iddialar əsasında tətbiq olunub.
ABŞ Maliyyə Nazirliyi iki İran vətəndaşını, dörd Çin vətəndaşını və Honkonqda yerləşən üç şirkəti sanksiya siyahısına əlavə edib. Bundan başqa, mövcud məhdudiyyətlər bir İran vətəndaşı, eləcə də Belarus və İranda fəaliyyət göstərən iki şirkəti də əhatə edəcək şəkildə genişləndirilib.
ABŞ rəsmilərinin iddiasına görə, Çin tərəfdən İrana mobil zenit-raket sistemlərinin tədarükü həyata keçirilib, bu prosesdə isə Belarus şirkəti vasitəçi kimi çıxış edib.
