OMM Redaksiyası
ABŞ-nin Ər-Riyadda yerləşən səfirliyi ölkədə çalışan hökumət əməkdaşlarının xüsusi icazə olmadan Səudiyyə Ərəbistanının hava limanlarından istifadəsinə qadağa qoyulduğunu açıqlayıb.
Gücləndirilmiş təhlükəsizlik tədbiri ötən həftə paytaxtdakı Kral Xalid Beynəlxalq Hava Limanına Husi hücumu nəticəsində azı 13 nəfərin həlak olmasından sonra tətbiq edilib.
Səfirlik Səudiyyə Ərəbistanı hava limanlarından istifadə etməyi planlaşdıran ABŞ vətəndaşlarına son dərəcə ehtiyatlı olmağı tövsiyə edib. Vətəndaşlara uçuşların vəziyyətini birbaşa aviaşirkət və hava limanları ilə dəqiqləşdirmək, mümkün hücumlar, hava məkanının bağlanması və uçuşların ləğvi risklərini nəzərə almaq barədə xəbərdarlıq edilib.
Səudiyyə Ərəbistanının Mülki Aviasiya Baş İdarəsi Kral Xalid Beynəlxalq Hava Limanında əməliyyatların dayandırılmasını oktyabrın 17-dək uzadıb. Ciddədəki Kral Əbdüləziz və Dammamdakı Kral Fəhd beynəlxalq hava limanları isə gecikmə və ləğvlərlə fəaliyyət göstərir.
ABŞ səfirliyi Səudiyyə Ərəbistanına və ölkədən hava yolu ilə səfərə alternativ kimi avtomobil, qatar və avtobus nəqliyyatından istifadə imkanlarını da xatırladıb. Qonşu Bəhreyn, İordaniya, Oman, Qətər və Birləşmiş Ərəb Əmirliklərindəki beynəlxalq hava limanları fəaliyyətini davam etdirir.
Yəmənin beynəlxalq səviyyədə tanınan hökumətinin məlumatına görə, husilər cümə axşamı ölkənin cənubundakı Ədən şəhərində prezident sarayının kompleksinə raket zərbələri endirib. Hücum nəticəsində beş nəfər ölüb, 16 nəfər yaralanıb. Ölən və yaralananlar arasında mühafizəçilər və mülki işçilər var.
Yəmənin informasiya naziri Mummar əl-İryani bildirib ki, baş nazir və kabinet üzvləri hücum zamanı təhlükəsiz olublar. Şahidlər sarayın yaxınlığında güclü partlayış səsləri eşitdiklərini deyiblər.
Husi hərbi sözçüsü Yəhya Səri Ədəndə Səudiyyə Ərəbistanının hərbi əməliyyatlar qərargahı kimi təsvir etdiyi obyektin bombalandığını bildirib. Onun sözlərinə görə, bu, qrupun Səudiyyə qüvvələrinin yerləşdiyi yerləri hədəfə almaq siyasətinin bir hissəsidir.
