OMM Redaksiyası
Ər-Riyaddakı Kral Xalid Beynəlxalq Hava Limanında şənbə günü günortadan sonra baş verən partlayış nəticəsində 12 nəfər ölüb, 309 nəfər yaralanıb. Bu barədə Səudiyyə Ərəbistanının Mülki Aviasiya Baş İdarəsi məlumat yayıb.
Qurumun açıqlamasında hava limanının ölkədə mülki aviasiya obyektlərinə qarşı davam edən hücumlar fonunda hədəfə alındığı bildirilib. Hava limanı növbəti xəbərdarlığadək bağlı qalacaq.
“AnewZ” telekanalının Ər-Riyadda çalışan xüsusi müxbiri Sabir Səfərov hadisə yerindən görüntülər təqdim edib. Məlumata görə, həmin görüntülər “BBC” və “Al Jazeera” da daxil olmaqla, bir sıra beynəlxalq media qurumlarında yayımlanıb.
Hadisə husilərin üzərinə götürdüyü son hücumlardan sonra bölgədə təhlükəsizlik vəziyyətinin gərginləşdiyi bir vaxta təsadüf edib. Hava limanları və mülki aviasiya obyektləri də genişmiqyaslı münaqişənin təsirinə məruz qalır.
Oktyabrın 8-də hava limanının infrastrukturuna və Səudiyyə Ərəbistanının milli aviaşirkətinə məxsus təyyarəyə iki hücum edildiyi bildirilmişdi. Səudiyyə aviasiya orqanlarının məlumatına görə, həmin hücumlarda pilot da daxil olmaqla üç Səudiyyə Ərəbistanı vətəndaşı həlak olub.
Hücumlar hava nəqliyyatında ciddi fasilələrə səbəb olub: cümə axşamı planlaşdırılan təxminən 300 reys ləğv edilib və ya həyata keçirilməyib. Təhlükəsizliklə bağlı narahatlıqlar artdıqca, bir neçə beynəlxalq aviaşirkət Ər-Riyada uçuşları dayandırıb.
Avropa İttifaqının Aviasiya Təhlükəsizliyi Agentliyi Səudiyyə Ərəbistanının hava məkanından istifadə ilə bağlı xəbərdarlıqlarını genişləndirib. Bu addım regional münaqişənin kommersiya aviasiyasına mümkün təsirləri ilə bağlı narahatlığın artdığını göstərir.
Ər-Riyadda fəaliyyət göstərən Almaniya, ABŞ, Kanada və İspaniya diplomatik nümayəndəlikləri də öz vətəndaşlarına hava limanından uzaq durmağı tövsiyə ediblər.
Ağ Evdə jurnalistlərin suallarını cavablandıran ABŞ Prezidenti Donald Tramp Vaşinqtonun Səudiyyə Ərəbistanı ilə birlikdə husilərə zərbə endirmək məsələsinə yaxın vaxtlarda qərar verəcəyini deyib. “Bunu edə bilərik. Məsələni nəzərdən keçirəcəyik. Son hücum barədə indicə xəbər tutduq, qərar verəcəyik. Biz çox sürətlə hərəkət edirik”, – Tramp bildirib.
Hadisə ilə bağlı məlumatlar yenilənir.
