OMM Redaksiyası
"İran hakimiyyəti zənginləşdirilmiş nüvə materiallarını ölkədən çıxarmaq niyyətində deyil".
“Operativ Məlumat Mərkəzi-OMM” xəbər verir ki, bu sözləri İran Ali Milli Təhlükəsizlik Şurasının katibi Möhsün Rzayi deyib.
O bildirib ki, Tehran bu materiallardan gələcəkdə nüvə enerjisi ilə işləyən gəmi və sualtı qayıqların inşası proqramlarında istifadə etməyi planlaşdırır.
"Zənginləşdirilmiş nüvə materiallarının bir zərrəsinin belə İrandan çıxarılmasına icazə verməyəcəyik", - deyə Rzayi bildirib.
O əlavə edib ki, Tehran bu barədə Rusiyadakı tərəfdaşlarını da məlumatlandırıb və zənginləşdirilmiş materiallar ölkədə qalacaq, onlardan istifadə ediləcək.
Rzayi Yaxın Şərqdəki böhranın nizamlanması üçün İranın irəli sürdüyü şərtlərdən birinin də Qərbi Asiyada, xüsusilə Livanda bütün hərbi əməliyyatların dayandırılması olduğunu xatırladıb.
O vurğulayıb ki, ABŞ-nin zərbələri yenidən başlayacağı təqdirdə İran cavab verəcək.
İran rəsmisi həmçinin ölkəsinin ABŞ-yə məxsus pilotsuz uçuş aparatlarını aşkar etməyə və vurmağa imkan verən radioelektron mübarizə vasitələri hazırladığını iddia edib.
