Afət Ziyadqızı
Rusiya Xarici İşlər Nazirliyinin rəsmi nümayəndəsi Mariya Zaxarova Almaniya kansleri Fridrix Merzi Almaniyanın hərbi-sənaye kompleksinin “qulu” adlandırıb.
“Operativ Məlumat Mərkəzi-OMM” xəbər verir ki, Zaxarova bu barədə “Sputnik” radiosunun efirində danışıb.
Onun sözlərinə görə, Merz hərbi-sənaye şirkətlərinin maraqlarını yalnız lobbiləşdirmir, həm də onlara xidmət edir.
“O, sadəcə onların maraqlarını lobbiləşdirmir, onlara xidmət edir. Merz hərbi-sənaye kompleksinin quludur. Buna görə də daha çox pul və sifariş lazımdır ki, görünür, Merzə də nəsə çatsın”, – Zaxarova bildirib.
Qeyd edək ki, bundan əvvəl Almaniyanın xarici işlər naziri İohan Vadeful Ukrayna lideri Vladimir Zelenskini tənqid edib.
Nazir hesab edir ki, Berlin Ukraynaya ən fəal maliyyə və hərbi yardım göstərən ölkələrdən biri olduğuna görə bunun qarşılığında fayda əldə etməlidir.
Vadeful Kiyevi Almaniyanın hərbi-sənaye kompleksindən sifarişlərin həcmini artırmağa çağırıb.
