OMM Redaksiyası
Beynəlxalq Miqrasiya Təşkilatı (IOM) cümə günü açıqlayıb ki, Yəməndə döyüşlərin ötən həftə şiddətlənməsindən sonra 46 mindən çox insan məcburi köçkünə çevrilib. Təşkilat köçkünlərin sayının “saatbasaat” artdığını xəbərdar edib.
IOM-un baş direktoru Emi Poup bildirib ki, bir çox ailə münaqişə başlayandan bəri ikinci və ya üçüncü dəfə evlərini tərk etməyə məcbur olur. Onun sözlərinə görə, ailələrin “demək olar ki, heç nəyi qalmayıb”.
Poup döyüşlərin yayılması fonunda humanitar yardımın çatdırılmasının getdikcə çətinləşdiyini deyib. O, bütün tərəfləri mülki şəxsləri, yardım əməkdaşlarını, eləcə də yardım üçün istifadə olunan ləvazimatları, nəqliyyat vasitələrini və obyektləri qorumağa çağırıb.
IOM-un məlumatları cümə axşamına olan vəziyyətə əsasən Yəmənin qərb sahillərini və Təiz vilayətini əhatə edir. Məlumata görə, çox sayda insan gecə saatlarında Moha liman şəhərini tərk edib və özləri ilə götürə bildikləri əşyaları aparıb.
Yeni köçkünlərin Lahc və Ədən əyalətlərinə gəldiyi, digərlərinin isə şimal istiqamətində İbb vilayətinə doğru hərəkət etdiyi bildirilir. Maqbanah, Cəbəl Həbəşi və Əl-Məafir rayonlarında döyüşlərin yaşayış məntəqələrinə yaxınlaşması nəticəsində kəndlərin tamamilə boşaldıldığı qeyd olunur.
Əhəmiyyətli təchizat marşrutu olan Moha–Təiz yolunun da bağlandığı bildirilir. Bu vəziyyət artıq köçkün ailələrinə dəstək verməkdə çətinlik çəkən yerli icmaların üzərinə əlavə yük qoyur.
IOM münaqişənin əvvəlindən etibarən məcburi köçkünlərə sığınacaq, torpaq və əmlak məsələləri, düşərgələrin əlaqələndirilməsi və idarə olunması, eləcə də digər sahələr üzrə dəstək göstərib. Lakin təhlükəsizlik vəziyyətinin pisləşməsi səbəbindən təşkilat cümə günü bütün əməliyyat hərəkətlərini müvəqqəti dayandırıb.
Təşkilat münaqişə tərəflərindən təhlükəsiz və davamlı humanitar çıxışın təmin edilməsini, yardım əməkdaşlarının və obyektlərinin qorunmasını, həmçinin yardımın çatdırılması üçün vacib olan rabitə və nəqliyyat əlaqələrinin bərpasını tələb edib.
IOM bildirib ki, ötən ay daşqınlara cavab tədbirləri zamanı təcili yardım ehtiyatları artıq tükənib. Hazırda ən təxirəsalınmaz ehtiyaclar sığınacaq, ərzaq, su, məişət əşyaları, tibbi xidmət və müdafiə xidmətləridir. Genişmiqyaslı telekommunikasiya problemləri isə köçkünlərin sayını dəqiq müəyyənləşdirməyi çətinləşdirir.
