OMM Redaksiyası
Yəməndə Səudiyyə Ərəbistanının dəstəklədiyi hökumət qüvvələri ilə İranın dəstəklədiyi husilər arasında zorakılıq yenidən artıb. BMT qurumları döyüşlər zamanı məcburi köçkün düşərgələrinin və səhiyyə müəssisələrinin hücuma məruz qaldığını, mülki itkilərin yüksəldiyini açıqlayıb.
Son toqquşmalar 2022-ci ildə əldə olunan atəşkəsdən sonra böyük ölçüdə dondurulmuş Yəmən vətəndaş müharibəsində kəskin eskalasiya kimi qiymətləndirilir. BMT-nin məlumatına görə, son həftələrdə 130 mindən çox insan evlərini tərk edib. Onların bir qismi Qırmızı dənizi keçərək Afrikaya sığınıb.
Hücumlar nəticəsində uşaqlar da ölüb
Ümumdünya İnsan Hüquqları üzrə Ali Komissar Volker Türk bildirib ki, onun rəhbərlik etdiyi qurum avqust ayından etibarən məcburi köçkünlərin yerləşdiyi məkanlara qarşı üç hücum sənədləşdirib. Avqustun 7-də, sentyabrın 7-də və 9-da Mərib bölgəsində baş verən hücumlar nəticəsində onlarla insan zərər çəkib, beş uşaq həlak olub.
Türkün ofisi avqust ayından bu yana pilotsuz uçuş aparatları və raket zərbələrinin də daxil olduğu döyüşlərdə 15 uşaq və üç qadın olmaqla 32 mülki şəxsin öldüyünü müəyyənləşdirib. Son eskalasiya zamanı ümumilikdə 125 nəfərin öldüyü və ya yaralandığı bildirilib. BMT rəsmiləri təhlükəsizlik problemləri və ərazilərə məhdud çıxış səbəbindən real rəqəmin daha yüksək ola biləcəyini qeyd ediblər.
“Bu son döyüş dalğasının əsas yükünü mülki şəxslər daşıyır”, – Volker Türk bildirib.
Səhiyyə müəssisələrinə hücumlar
Ümumdünya Səhiyyə Təşkilatı bəzi tibb müəssisələrinin birbaşa hücuma məruz qaldığını açıqlayıb. Təşkilatın məlumatına görə, sentyabrın 18-də Ləhcdə ambulans sürücüsü və tibb işçisi öldürülüb. Hücuma görə məsuliyyətin hansı tərəfin üzərinə düşdüyü açıqlanmayıb.
Hər iki tərəf son həftələrdə gedən döyüşlərdə yüzlərlə insanın öldüyünü iddia etsə də, bununla bağlı ətraflı məlumat təqdim etməyib. Husilərin sözçüsü Məhəmməd Əbdülsəlam BMT-nin insan hüquqları ofisinin artıq qərəzsiz olmadığını bildirib və qurumun ittihamlarını rədd edib. O, Səudiyyə qüvvələrini islah müəssisəsi, evlər və məktəblər də daxil olmaqla mülki obyektləri bombalamaqda ittiham edib.
Yəməndə humanitar ehtiyaclar artır
Yəməndə 70-dən çox BMT əməkdaşının husilər tərəfindən saxlanıldığı bildirilir. Onların bəzilərinin illərdir həbsdə olduğu qeyd edilir. Volker Türk əməkdaşların azad edilməsinə çağırıb və bütün tərəfləri mülki əhalini qorumağa səsləyib.
Yəmən əhalisinin təxminən yarısına bərabər olan 18 milyon insan kəskin ərzaq çatışmazlığı ilə üzləşir. Ümumdünya Səhiyyə Təşkilatı yaraların müalicəsi üçün qan torbaları, travma dəstləri və cərrahi avadanlıq göndərir, həmçinin xəsarətlərin artdığı ərazilərə təcili yardım qrupları yerləşdirir.
Bununla belə, bir çox insan lazımi yardımdan məhrum qalır. BMT-nin Yəmən üzrə qaçqınlara yardım planı yenilənmiş zorakılıqdan əvvəl 20 faizdən az maliyyələşdirilmişdi.
Təcdə düşərgəsində yaşayan və dörd uşaq anası olan Aişə Əhməd bildirib ki, son həftələrdə bölgəyə gələn insanların sayı su və digər əsas ehtiyatların çatışmazlığını daha da artırıb.
“Suya və hər şeyə ehtiyacımız var. Heç nəyimiz yoxdur”, – Aişə Əhməd deyib.
