OMM Redaksiyası
Fevralın 19-da ABŞ-nin paytaxtı Vaşinqtonda Azərbaycan Prezidenti İlham Əliyevin qaldığı otelin qarşısında baş verən etiraz aksiyası ilə bağlı yeni təfərrüatlar üzə çıxıb.
“Operativ Məlumat Mərkəzi-OMM” xəbər verir ki, hadisə dövlət başçısının ABŞ Prezidenti Donald Trampın sədrliyi ilə keçirilən "Sülh Şurası"nın (Board of Peace) təsis iclasında iştirakı çərçivəsində baş verib.
"Waldorf Astoria" otelinin qarşısında baş verən insident zamanı bir qrup şəxs Azərbaycan rəhbərliyinə qarşı təhqiramiz şüarlar səsləndirərək təxribat törətməyə cəhd göstərib. Təhlükəsizlik qüvvələrinin müdaxiləsi nəticəsində asayiş bərpa edilib və şəxslərin mühafizə olunan zonaya daxil olmasının qarşısı alınıb.
Aparılan araşdırmalar nəticəsində aksiyada iştirak edən bir neçə şəxsin kimliyi müəyyənləşdirilib:
- Adil Əmrahlı: 1990-cı il təvəllüdlü, Rusiya Federasiyası vətəndaşı. 2022-ci ildə Azərbaycanı tərk edərək ABŞ-a köçüb.
- Rəhim Yaqublu: Müxalifətçi Tofiq Yaqublunun oğlu, "Müsavat" partiyasının üzvü. 2022-ci ildən ABŞ-da yaşayır.
- Bəxtiyar Abbasov: Rusiya vətəndaşlığı daşıyır, 2015-ci ildə Azərbaycanı tərk edib.
- Xilas İsayev, Kənan Cəfərov və Tural Ələkbərli: Hazırda xaricdə yaşayan digər iştirakçılar.
Məlumata görə, iştirakçıların bir çoxunun keçmişi Rusiya Federasiyası ilə bağlıdır və onlar Qərb ölkələrinə köçməzdən əvvəl uzun müddət orada yaşayıblar.
