BBC-nin apardığı araşdırma peyk görüntülərinin təhlilinə əsaslanaraq, İranın Yaxın Şərqdəki ABŞ hərbi obyektlərinə endirdiyi zərbələrin miqyasını ortaya qoyub. Məlumata görə, 28 fevral tarixində ABŞ və İsrailin hərbi əməliyyatlara başlamasından sonra İran regionda yerləşən 20-yə yaxın ABŞ hərbi bazasına və obyektinə ciddi ziyan vurub. Bu rəqəm əvvəlki rəsmi qiymətləndirmələrdən xeyli yüksəkdir.
Təhlillər göstərir ki, fevralın sonundan etibarən İranın hədəf aldığı hərbi obyektlər səkkiz ölkənin ərazisində yerləşir:
- Səudiyyə Ərəbistanı
- Birləşmiş Ərəb Əmirlikləri
- Qətər
- Küveyt
- İraq
- İordaniya
- Bəhreyn
- Oman
Hücumlar nəticəsində əsasən hava hücumundan müdafiə sistemləri, radar qurğuları, peyk rabitə infrastrukturu və silah anbarları zərər görüb. Mütəxəssislər zədələnmiş obyektlərin sayının 20-dən çox olduğunu, hətta 28-ə çata biləcəyini ehtimal edirlər. Zərərin tam miqyasını müəyyən etmək isə hazırda çətin olaraq qalır.
Pentaqon “Epik Qəzəb” əməliyyatının ümumi dəyərinin 29 milyard dollar olduğunu açıqlasa da, ekspertlər bu rəqəmin yalnız silahların bərpası və texniki xərcləri əhatə etdiyini, real vəziyyəti tam əks etdirmədiyini bildirirlər. Ağ Ev İran ordusunun zəiflədiyini iddia etsə də, analitiklər peyk görüntülərinin əks-hücumların daha geniş miqyaslı olduğunu sübut etdiyini vurğulayırlar. ABŞ Müdafiə Nazirliyi isə məsələ ilə bağlı şərh verməkdən imtina edərək, bunu əməliyyat təhlükəsizliyi ilə əlaqələndirib.
