OMM Redaksiyası
Avropa Voleybol Konfederasiyası (CEV) qadın voleybolçular arasında Çempionlar Liqasında mübarizə aparan “Turan”ın uğurunu qeyd edib. Tovuz klubu III təsnifat mərhələsinin ilk oyununda Bolqarıstanın “Maritsa” komandasını səfərdə 3:0 (25:22, 25:22, 25:20) hesabı ilə məğlub edib.
CEV komandanın meydandakı ahəngdar oyununa diqqət çəkib və qələbənin 81 dəqiqəyə əldə olunduğunu bildirib. “Turan” debüt mövsümündə turnirin qrup mərhələsinə yüksəlmək üçün noyabrın 11-də keçiriləcək cavab oyununda istənilən hesablı qələbə qazanmalıdır.
Azərbaycan klublarının Avropa uğurları
Konfederasiyanın materialında “Turan”ın vaxtilə Avropanın güclü komandaları sırasında olmuş “Rabitə”nin yolunu davam etdirmək istədiyi vurğulanıb. Bakı klubu 2011-ci ildə klublararası dünya çempionatının qalibi, 2012-ci ildə gümüş mükafatçısı olub. “Rabitə” 2011 və 2013-cü illərdə CEV Çempionlar Liqasında gümüş, 2014-cü ildə isə bürünc medal qazanıb.
Azərbaycanın digər uğurlu klubu “Azərreyl” 2002-ci ildə CEV Top Komandalar Kubokunu, 2011-ci ildə Çağırış Kubokunu qazanıb.
“Xilasedici”nin oyunu
CEV kişi voleybolu üzrə Çempionlar Liqasında debüt edən “Xilasedici”nin çıxışından da bəhs edib. Azərbaycan klubunun “Sportinq”lə ev oyununu 1500 azarkeş izləyib. “Xilasedici” 2:1 önə keçsə də, üstünlüyünü qoruya bilməyib və qarşılaşma Portuqaliya klubunun 3:2 hesablı qələbəsi ilə başa çatıb.
Cavab görüşü noyabrın 11-də Portuqaliyada keçiriləcək. Məğlub olacağı halda “Xilasedici” mübarizəni CEV Kubokunda davam etdirəcək.
Kontekst
Oktyabrın 30-da “Turan” Çempionlar Liqasının ikinci təsnifat mərhələsinin cavab oyununda “Mladost”u 3:2 hesabı ilə məğlub edərək III mərhələyə yüksəlib. Baş məşqçi Ziya Rəcəbov həmin qarşılaşmada yol yorğunluğu, ölkələr arasındakı üç saatlıq fərq və hazırlıq vaxtının azlığının komandaya təsir etdiyini deyib.
