Afət Ziyadqızı
"TRIPP layihəsinin təməl işləri 2026-cı ildə başlayacaq".
“Operativ Məlumat Mərkəzi-OMM” xəbər verir ki, bu barədə Ermənistanın Baş naziri Nikol Paşinyan məlumat verib.
Bildirilib ki, Paşinyan hakim Vətəndaş Müqaviləsi Partiyasının seçki proqramının təqdimatı zamanı TRIPP layihəsi ilə bağlı planlardan danışıb.
Baş nazirin sözlərinə görə, layihə çərçivəsində təməl işlərinə 2026-cı ilin əvvəlində başlanacağı gözlənilir.
“Əminəm ki, təməl işlərinə 2026-cı ilin əvvəlində başlayacağıq. Hesablamalarıma görə, elektrik xətləri daha tez işə düşəcək. Bu layihə həm də çoxsaylı iş yerləri yaradacaq”, – deyə o bildirib.
Paşinyan əlavə edib ki, Gümrü–Türkiyə sərhədi və Yerasx–Naxçıvan sərhədi dəmir yolu hissələrinin yenidən qurulması 1–1,5 il ərzində həyata keçirilə bilər.
Məlumata görə, TRIPP (“Trampın Beynəlxalq Sülh və Rifaha Doğru Yolu”) Ermənistan və ABŞ-nin birgə investisiya layihəsi kimi nəzərdə tutulur və regionda nəqliyyat infrastrukturunun inkişafını hədəfləyir. Layihə Gümrü–Qars dəmir yolu xəttinin bərpası və Ermənistan–Azərbaycan nəqliyyat bağlantılarının açılmasını da əhatə edir.
Qeyd olunub ki, layihənin həyata keçirilməsi regionun şərq–qərb və şimal–cənub nəqliyyat dəhlizlərində mühüm rol oynaya bilər.
