ABŞ Prezidenti Donald Tramp Venesueladakı hərbi əməliyyatın uğursuzluğundan narahat olduğunu bildirib.
"Operativ Məlumat Mərkəzi-OMM" xəbər verir ki, Tramp bu fikri “The New York Times” qəzetinə verdiyi müsahibədə səsləndirib və onu keçmiş ABŞ Prezidenti Cimmi Karterin 1980-ci ildə İranda baş tutan uğursuz əməliyyatı ilə müqayisə edib.
Tramp 24 aprel 1980-ci ildə İranda 52 amerikalı girovun xilas edilməsi məqsədilə keçirilən “fəlakətli əməliyyat” barədə danışıb. O xatırladıb ki, səhrada Amerika helikopteri təyyarə ilə toqquşmuşdu və nəticədə əməliyyat uğursuzluqla nəticələnmişdi. Trampın sözlərinə görə, bu hadisə Karterin siyasi irsini ləkələmiş, lakin ABŞ-nin daha təlim keçmiş xüsusi təyinatlı qüvvələrinin yaradılmasına səbəb olmuşdu.
“Onun seçkilərdə qalib gəlib-gəlməyəcəyini bilmirəm, amma bu fəlakətdən sonra onun heç bir şansı yox idi”, – deyə Tramp bildirib.
Prezident Venesueladakı əməliyyatın uğurunu sələflərinin uğursuzluqları ilə müqayisə edərək xüsusilə Co Baydenin rəhbərliyi altında aparılan Əfqanıstandan qoşunların çıxarılması əməliyyatını xatırladıb. Tramp qeyd edib ki, bu əməliyyat nəticəsində 13 amerikalı hərbçi həlak olmuşdu və bu, ABŞ-nin strateji uğurlarını sual altına qoymuşdu.
Trampın fikrincə, keçmiş uğursuzluqlar hərbi planlaşdırma və xüsusi qüvvələrin təkmilləşdirilməsinin vacibliyini göstərir və Venesueladakı əməliyyat üçün də eyni diqqətin göstərilməsini tələb edir.
